గూడూరు: పట్టణంలో శాంతిభద్రతలను మరింత బలోపేతం చేయడం, నేరాలను నియంత్రించడం లక్ష్యంగా గూడూరు II టౌన్ పోలీస్ స్టేషన్ పరిధిలో విస్తృత స్థాయిలో కార్డన్ & సెర్చ్ కార్యక్రమాన్ని పోలీసులు నిర్వహించారు. ఈ రోజు ఉదయం తెల్లవారుజామున సుమారు 5 గంటల ప్రాంతంలో గూడూరు పట్టణంలోని గాంధీ నగర్, దండూరా కాలనీ ప్రాంతాల్లో ఈ తనిఖీలు చేపట్టడం జరిగింది.
ఈ కార్యక్రమంలో భాగంగా పోలీసులు ఆయా ప్రాంతాల్లో సుమారు 60 ఇళ్లను సోదా చేశారు. తనిఖీల సందర్భంగా సరైన పత్రాలు లేని 10 ద్విచక్ర వాహనాలను గుర్తించి స్వాధీనం చేసుకున్నారు. వాహనాలకు సంబంధించిన పూర్తి వివరాలు సేకరించి, చట్టపరమైన చర్యలు తీసుకునే ప్రక్రియ కొనసాగింది పోలీసులు తెలిపారు. ఈ తరహా తనిఖీలు ప్రజల భద్రత దృష్ట్యా తరచూ నిర్వహించబడతాయని అధికారులు వెల్లడించారు.
ఈ కార్డన్ & సెర్చ్ కార్యక్రమాన్ని గూడూరు II టౌన్ సర్కిల్ ఇన్‌స్పెక్టర్ శ్రీనివాస్ ఆధ్వర్యంలో నిర్వహించగా, I టౌన్ మరియు రూరల్ పోలీస్ స్టేషన్‌లకు చెందిన సిబ్బంది కూడా పాల్గొన్నారు. ఉన్నతాధికారుల పర్యవేక్షణలో ఈ కార్యక్రమం సమర్థవంతంగా నిర్వహించబడింది.
తనిఖీల అనంతరం స్థానిక ప్రజలతో ప్రత్యేక అవగాహన సమావేశాన్ని నిర్వహించారు. ఈ సమావేశంలో ప్రజల భద్రత మరియు ఆరోగ్యాన్ని దృష్టిలో ఉంచుకుని పలు ముఖ్యమైన అంశాలపై విస్తృతంగా అవగాహన కల్పించారు. ముఖ్యంగా ద్విచక్ర వాహనదారులు తప్పనిసరిగా హెల్మెట్ ధరించాలని పోలీసులు సూచించారు. హెల్మెట్ వినియోగం వల్ల ప్రమాదాల సమయంలో ప్రాణాపాయం నుంచి రక్షణ పొందవచ్చని, హెల్మెట్ లేకుండా వాహనాలు నడపడం వల్ల చిన్న ప్రమాదాలే ప్రాణాంతకంగా మారే అవకాశం ఉంటుందని వివరించారు. తమ ప్రాణాల రక్షణ కోసం ప్రతి ఒక్కరూ హెల్మెట్ ధరించడం అలవాటుగా మార్చుకోవాలని సూచించారు.
అదేవిధంగా మాదక ద్రవ్యాల వినియోగం వల్ల కలిగే తీవ్రమైన దుష్ప్రభావాలపై కూడా పోలీసులు ప్రజలకు అవగాహన కల్పించారు. గంజాయి వంటి మాదక ద్రవ్యాలు ఆరోగ్యాన్ని నాశనం చేయడమే కాకుండా కుటుంబాలను మరియు సమాజాన్ని తీవ్రంగా ప్రభావితం చేస్తాయని తెలిపారు. ముఖ్యంగా యువత మాదక ద్రవ్యాలకు దూరంగా ఉండాలని, అనుమానాస్పదంగా ఎవరైనా మాదక ద్రవ్యాలను విక్రయిస్తున్నట్లు గమనించిన వెంటనే పోలీసులకు సమాచారం అందించాలని కోరారు.
ఈ సందర్భంగా అత్యవసర పరిస్థితుల్లో 112 నంబర్ ద్వారా పోలీస్ సహాయం పొందవచ్చని ప్రజలకు తెలియజేశారు. అలాగే రోడ్డు భద్రతా నియమాలను పాటించడం, సైబర్ నేరాలపై అప్రమత్తంగా ఉండడం, అపరిచితుల కాల్స్ లేదా సందేశాలను నమ్మకూడదని సూచించారు. ఇళ్లలో తగిన భద్రతా చర్యలు తీసుకోవడం ద్వారా దొంగతనాలను నివారించవచ్చని కూడా వివరించారు.ప్రజలు పోలీసులకు సహకరించి తమ ప్రాంతంలో శాంతిభద్రతలను కాపాడడంలో భాగస్వాములు కావాలని అధికారులు కోరారు. భవిష్యత్తులో కూడా ఇలాంటి కార్డన్ & సెర్చ్ కార్యక్రమాలు కొనసాగుతాయని తెలిపారు.
Author: Prajaveek Shanam
