గూడూరు అల్లూరి ఆదిశేషారెడ్డి స్టేడియంలో క్రీడా చైతన్యం – పిల్లలకు ప్రేరణనిచ్చిన సంధ్యారాణి*

గూడూరులో 2026 సమ్మర్ కోచ్ ప్రారంభం 

నెల్లూరు జిల్లా గూడూరు పట్టణంలోని అల్లూరి ఆదిశేషారెడ్డి స్టేడియం లో 2026 సమ్మర్ కోచ్ కార్యక్రమాన్ని ఎమ్మెల్యే పాశం సునీల్ కుమార్ సతీమణి పాశం సంధ్యారాణి ఘనంగా ప్రారంభించారు. కార్యక్రమం ప్రారంభోత్సవం సందర్భంగా విద్యార్థులు, క్రీడాకారులు, తల్లిదండ్రులు భారీగా హాజరై ఉత్సాహభరిత వాతావరణం నెలకొంది.
ఈ కార్యక్రమంలో రాజన్న జనవిజ్ఞాన వేదిక సభ్యులు, హాకీ కోచ్ దీపక్, పీటీ కృష్ణ పాల్గొని విద్యార్థులకు క్రీడల ప్రాధాన్యతను వివరించారు. చిన్న వయస్సులోనే క్రీడలపై ఆసక్తి పెంపొందించుకోవడం ద్వారా శారీరక, మానసిక వికాసం సాధ్యమవుతుందని వారు పేర్కొన్నారు.ఈ సందర్భంగా ముఖ్య అతిథిగా పాల్గొన్న సంధ్యారాణి మాట్లాడుతూ, “పిల్లలు చిన్న వయస్సు నుంచే క్రీడలపై దృష్టి పెట్టాలి. క్రీడలు శారీరక దృఢత్వంతో పాటు మానసిక స్థైర్యాన్ని పెంచుతాయి. నేటి పోటీ ప్రపంచంలో చదువులతో పాటు క్రీడల్లోనూ ప్రతిభ కనబరిస్తేనే సంపూర్ణ అభివృద్ధి సాధ్యమవుతుంది” అని అన్నారు.
ఆమె ఇంకా మాట్లాడుతూ గ్రామీణ ప్రాంతాల్లోనూ ఎంతోమంది ప్రతిభావంతులు ఉన్నారని, సరైన శిక్షణ, మార్గదర్శకత్వం లభిస్తే వారు రాష్ట్ర, జాతీయ స్థాయిలో రాణించగలరని తెలిపారు. విద్యార్థులు మొబైల్ ఫోన్లు, టీవీలకు దూరంగా ఉండి క్రీడలకు సమయం కేటాయించాలని సూచించారు.క్రీడలు క్రమశిక్షణ, జట్టు భావన, నాయకత్వ లక్షణాలను పెంపొందిస్తాయని పేర్కొన్న ఆమె, ప్రభుత్వం క్రీడా రంగ అభివృద్ధికి ప్రాధాన్యత ఇస్తోందని, యువత అందుబాటులో ఉన్న అవకాశాలను వినియోగించుకోవాలని పిలుపునిచ్చారు.
కోచ్ దీపక్ మాట్లాడుతూ గూడూరు ప్రాంతంలో క్రీడలకు విస్తృత అవకాశాలు ఉన్నాయని, తల్లిదండ్రులు పిల్లలను ప్రోత్సహిస్తే వారు ఉన్నత స్థాయికి ఎదగగలరని అన్నారు. పీటీ కృష్ణ కూడా విద్యార్థులకు ప్రాథమిక క్రీడా నైపుణ్యాలపై అవగాహన కల్పించారు.ఈ కార్యక్రమంలో స్థానిక ప్రముఖులు, తల్లిదండ్రులు, విద్యార్థులు పెద్ద ఎత్తున పాల్గొని సమ్మర్ కోచ్ కార్యక్రమానికి మద్దతు తెలిపారు. కార్యక్రమం మొత్తం ఉత్సాహంగా సాగి, విద్యార్థుల్లో క్రీడలపై మరింత ఆసక్తిని పెంపొందించింది.

Author: Prajaveek Shanam