ఉరి విధానానికి సుప్రీం మద్దతు
మరణశిక్ష అమలు విధానంపై పిల్ తిరస్కరణ
శాస్త్రీయ ఆధారాలు ఉంటే భవిష్యత్‌లో పరిశీలనకు అవకాశం
ప్రాణాంతక ఇంజెక్షన్ అమలుపై భిన్న వాదనలు
కేంద్రం నిర్ణయం తీసుకోవచ్చన్న సుప్రీం అభిప్రాయం
న్యూఢిల్లీ, ఆగస్టు 18 (ప్రజా వీక్షణం ):
మరణశిక్ష విధించబడిన దోషులను ఉరి ద్వారా శిక్షించే ప్రస్తుత విధానాన్ని రద్దు చేసి, దాని స్థానంలో నొప్పిలేని ప్రత్యామ్నాయ పద్ధతిని అమలు చేయాలంటూ దాఖలైన ప్రజాహిత వ్యాజ్యాన్ని సుప్రీంకోర్టు మంగళవారం తిరస్కరించింది. జస్టిస్ విక్రమ్ నాథ్, జస్టిస్ సందీప్ మెహతాతో కూడిన ధర్మాసనం ఈ మేరకు తీర్పు వెలువరించింది. భారతీయ శిక్షా విధానంలో ప్రస్తుతం అమలులో ఉన్న ఉరి శిక్ష విధానాన్ని కాలం చెల్లినదిగా పేర్కొంటూ దానిని మార్చాలని పిటిషనర్ కోరారు. అయితే ఈ అంశంపై ఇదే తుది నిర్ణయం కాదని సుప్రీంకోర్టు స్పష్టం చేసింది. భవిష్యత్తులో కొత్త శాస్త్రీయ ఆధారాలు, సాంకేతిక పరిజ్ఞానం లేదా మరణశిక్ష అమలుకు సంబంధించి మెరుగైన విధానాలు అందుబాటులోకి వస్తే వాటిని పరిశీలించే అవకాశం ఉంటుందని పేర్కొంది. ప్రస్తుతం దాఖలైన రిట్ పిటిషన్‌ను మాత్రమే కొట్టివేస్తున్నామని, అవసరమైతే రాజ్యాంగ ధర్మాసనం ఈ అంశాన్ని భవిష్యత్తులో పరిశీలించవచ్చని తెలిపింది.
మరణశిక్ష అమలుకు సంబంధించి శాస్త్రీయంగా మరింత అనుకూలమైన విధానాలను పరిశీలించడంలో కేంద్ర ప్రభుత్వానికి పూర్తి స్వేచ్ఛ ఉందని ధర్మాసనం అభిప్రాయపడింది. ప్రభుత్వం తగిన నిపుణుల అభిప్రాయాలు, పరిశోధనలు, అంతర్జాతీయ అనుభవాలను పరిగణనలోకి తీసుకుని నిర్ణయం తీసుకోవచ్చని సూచించింది. సీనియర్ న్యాయవాది రిషి మల్హోత్రా 2017లో ఈ ప్రజాహిత వ్యాజ్యాన్ని దాఖలు చేశారు. క్రిమినల్ ప్రొసీజర్ కోడ్‌లోని సెక్షన్ 354(5) ప్రకారం ఉరి ద్వారా మరణశిక్ష అమలు చేయడాన్ని సవాలు చేస్తూ ఆయన కోర్టును ఆశ్రయించారు. అనేక దేశాలు ఉరికి బదులుగా ఇతర పద్ధతులను అనుసరిస్తున్నాయని, భారతదేశం కూడా ప్రత్యామ్నాయ విధానాలపై ఆలోచించాలని పిటిషన్‌లో పేర్కొన్నారు. మరణశిక్ష అమలులో భాగంగా ప్రాణాంతక ఇంజెక్షన్‌ను ప్రత్యామ్నాయంగా పరిగణించాలని పిటిషనర్ తరఫు వాదనలు వినిపించబడ్డాయి. అయితే ఆ విధానం కూడా పూర్తిగా విజయవంతమైందని చెప్పలేమని సీనియర్ న్యాయవాది మీనాక్షి ఆరోరా కోర్టు దృష్టికి తీసుకువచ్చారు. ఈ అంశాన్ని సమగ్రంగా అధ్యయనం చేసేందుకు నిపుణుల కమిటీని ఏర్పాటు చేయాలని ఆమె కోరారు. విచారణ సందర్భంగా అటార్నీ జనరల్ ఆర్. వెంకటరమణి కూడా మరణశిక్ష అమలు విధానాలపై ప్రభుత్వం ఉన్నత స్థాయిలో చర్చలు జరుపుతున్నట్లు కోర్టుకు తెలిపారు. దీంతో భవిష్యత్తులో ఈ అంశంపై మరింత విస్తృత చర్చ జరిగే అవకాశం ఉన్నప్పటికీ, ప్రస్తుతం దేశంలో అమలులో ఉన్న ఉరి శిక్ష విధానం యథాతథంగా కొనసాగనుంది.
Author: Prajaveek Shanam
