- ప్రియుడి గదిలో బాత్రూంలో కుళ్లిన మృతదేహం
- గొంతు కోసి హత్య చేసినట్లు అనుమానం
- పరారీలో ప్రధాన నిందితుడు వివేక్ చౌబే
- బ్లాక్‌మెయిల్, అత్యాచారం కోణాల్లో దర్యాప్తు
వారణాసి, ఆగస్టు 22 (ప్రజా వీక్షణం ): ఉత్తరప్రదేశ్‌లోని వారణాసిలో నీట్ పరీక్షకు సిద్ధమవుతున్న ఓ యువతి హత్యకు గురైన ఘటన దేశవ్యాప్తంగా తీవ్ర కలకలం రేపుతోంది. వైద్య విద్యలో ప్రవేశం సాధించాలని కలలుగన్న ఆ యువతి ఆగస్టు 18న కళాశాలకు వెళ్తున్నానని ఇంటి నుంచి బయలుదేరి వెళ్లి అదృశ్యమైంది. కుటుంబ సభ్యులు పలుచోట్ల వెతికినా ఆచూకీ లభించకపోవడంతో పోలీసులను ఆశ్రయించారు. మూడు రోజులపాటు ఆచూకీ లేకపోవడంతో కుటుంబ సభ్యులు ఆందోళనకు గురయ్యారు. అయితే ఎవరూ ఊహించని విధంగా ఆమె మృతదేహం ప్రియుడు వివేక్ చౌబే అద్దెకు ఉంటున్న గదిలోని బాత్రూంలో కుళ్లిపోయిన స్థితిలో బయటపడటంతో ఈ ఘటన సంచలనంగా మారింది. ఉన్నత చదువులు పూర్తి చేసి వైద్యురాలిగా సేవలందించాలని ఆశపడిన యువతి జీవితానికి ఇంత దారుణ ముగింపు రావడం స్థానికులను కలచివేసింది. యువతి కనిపించకపోవడంతో పోలీసులు ఆమె మొబైల్ ఫోన్ సిగ్నళ్ల ఆధారంగా దర్యాప్తు ప్రారంభించారు. చివరిసారిగా ఆమె ఫోన్ వారణాసిలోని మాలవీయ ఇంటర్ కాలేజీ పరిసర ప్రాంతాల్లో పనిచేసినట్లు గుర్తించారు. ఇదే సమయంలో యువతి తల్లి, బంధువులు స్వయంగా ఆచూకీ కోసం అన్వేషణ చేపట్టారు. ఈ క్రమంలో మీర్జాపూర్ జిల్లాలోని సీఖర్ గ్రామంలో ఉన్న నిందితుడు వివేక్ చౌబే మేనమామ ఇంట్లో యువతికి చెందిన బ్యాగ్ కనిపించింది. అందులో దొరికిన తాళం చెవిని తీసుకుని నిందితుడు ఉంటున్న గదికి వెళ్లి పరిశీలించగా బాత్రూంలో దుర్వాసన వస్తున్నట్లు గుర్తించారు. తలుపు తెరిచి చూడగా యువతి మృతదేహం కుళ్లిపోయిన స్థితిలో కనిపించింది. వెంటనే పోలీసులకు సమాచారం అందించడంతో అధికారులు ఘటనా స్థలానికి చేరుకుని ఆధారాలను సేకరించారు. సంఘటన స్థలాన్ని పరిశీలించిన అధికారులు ఇది ముందస్తు ప్రణాళికతో చేసిన హత్య అయ్యి ఉండవచ్చని అనుమానిస్తున్నారు.పోస్టుమార్టం నివేదికలో యువతి గొంతు కోయడం వల్లే మరణించినట్లు వైద్యులు నిర్ధారించారు. ఆమె తలపై తీవ్ర గాయాలు ఉన్నట్లు గుర్తించారు. అంతేకాకుండా కాళ్లు కట్టివేయబడిన స్థితిలో మృతదేహం లభించడం కేసును మరింత భయానకంగా మార్చింది. యువతిపై లైంగిక దాడి కూడా జరిగి ఉండవచ్చనే అనుమానాలను పోలీసులు వ్యక్తం చేస్తున్నారు. దీనిపై స్పష్టత కోసం ఫోరెన్సిక్ పరీక్షలు నిర్వహిస్తున్నారు. మృతదేహం లభించిన గదిలో రక్తపు మరకలు, ఇతర ఆధారాలను స్వాధీనం చేసుకున్న అధికారులు వాటిని శాస్త్రీయ పరీక్షల కోసం పంపించారు. ఈ ఘటనలో మరెవరైనా పాల్గొన్నారా, హత్య తర్వాత ఆధారాలను తొలగించే ప్రయత్నాలు జరిగాయా అనే అంశాలపై కూడా దర్యాప్తు కొనసాగుతోంది. కుటుంబ సభ్యులు చేసిన ఆరోపణలు ఈ కేసుకు మరింత ప్రాధాన్యత తెచ్చాయి. వారి కథనం ప్రకారం వివేక్ చౌబే కొంతకాలంగా యువతిని వేధిస్తున్నాడు. ఆమె వేరే వ్యక్తిని వివాహం చేసుకుంటే మార్ఫింగ్ చేసిన ఫొటోలను సామాజిక మాధ్యమాల్లో వైరల్ చేస్తానంటూ బెదిరింపులకు పాల్పడినట్లు కుటుంబ సభ్యులు ఆరోపించారు. వచ్చే ఏడాది ఫిబ్రవరి 22న యువతి వివాహం మరో యువకుడితో నిశ్చయమైన తర్వాత నిందితుడి వైఖరిలో మార్పు వచ్చిందని వారు చెబుతున్నారు. ఈ వివాహాన్ని అడ్డుకోవాలనే ఉద్దేశంతోనే అతడు కుట్ర పన్నాడని కుటుంబ సభ్యులు అనుమానిస్తున్నారు. నీట్ పరీక్షకు సంబంధించిన సహాయం చేస్తానని నమ్మించి ఆమెను తన గదికి పిలిపించుకుని అక్కడే హత్య చేసినట్లు పోలీసులు ప్రాథమికంగా భావిస్తున్నారు.ఇదిలా ఉండగా ప్రధాన నిందితుడు వివేక్ చౌబే ఘటన అనంతరం పరారీలోకి వెళ్లాడు. అతడిని పట్టుకునేందుకు నాలుగు ప్రత్యేక పోలీసు బృందాలను ఏర్పాటు చేశారు. వారణాసి నగరంతో పాటు పరిసర జిల్లాల్లో విస్తృత గాలింపు చర్యలు కొనసాగుతున్నాయి. ఇప్పటివరకు పది మందికి పైగా అనుమానితులను అదుపులోకి తీసుకుని విచారించినట్లు అధికారులు వెల్లడించారు. నిందితుడి మొబైల్ కాల్ వివరాలు, బ్యాంకు లావాదేవీలు, సామాజిక మాధ్యమాల కార్యకలాపాలను పోలీసులు పరిశీలిస్తున్నారు. అతడు రాష్ట్రం దాటి వెళ్లి ఉండవచ్చనే అనుమానంతో ఇతర రాష్ట్రాల పోలీసులకు కూడా సమాచారం అందించారు. త్వరలోనే అతడిని పట్టుకుంటామని అధికారులు విశ్వాసం వ్యక్తం చేస్తున్నారు. ఈ కేసులో మరో కీలక అంశం సీసీటీవీ వ్యవస్థ పనిచేయకపోవడమే. నిందితుడు నివసిస్తున్న ఇంటి ప్రధాన ద్వారం వద్ద ఏర్పాటు చేసిన సీసీటీవీ కెమెరా ఘటన సమయంలో పనిచేయలేదని పోలీసులు గుర్తించారు. ఇది యాదృచ్ఛికమా లేక ముందే ప్రణాళిక ప్రకారం దాన్ని నిలిపివేశారా అనే కోణంలో దర్యాప్తు జరుగుతోంది. యువతి మొబైల్ ఫోన్, ల్యాప్‌టాప్‌తో పాటు ఇతర డిజిటల్ పరికరాలను పోలీసులు స్వాధీనం చేసుకుని పరిశీలిస్తున్నారు. వాటిలో లభించే సమాచారం కేసు దర్యాప్తులో కీలకంగా మారే అవకాశం ఉందని అధికారులు భావిస్తున్నారు. యువతి హత్యకు సంబంధించిన ప్రతి కోణాన్ని నిశితంగా పరిశీలిస్తున్నామని, నిందితుడిని కఠినంగా శిక్షించేలా పటిష్టమైన ఆధారాలు సేకరిస్తామని పోలీసులు స్పష్టం చేశారు. ఈ ఘటన దేశవ్యాప్తంగా మహిళల భద్రత, ఆన్‌లైన్ బ్లాక్‌మెయిల్, యువతపై పెరుగుతున్న నేరాలపై మరోసారి చర్చకు దారితీసింది.
Author: Prajaveek Shanam
