- రూ.2,395 కోట్లతో భారీ వంతెన
- ట్రాఫిక్ సమస్యలకు శాశ్వత పరిష్కారం
- 2029 నాటికి అందుబాటులోకి లక్ష్యం
- నాలుగు లేన్లతో ఆధునిక నిర్మాణం
ముంబై, ఆగస్టు 22 ప్రజా వీక్షణం ): ముంబై మహానగరంలో ట్రాఫిక్ రద్దీని తగ్గించి ప్రయాణ సమయాన్ని గణనీయంగా ఆదా చేయాలనే లక్ష్యంతో బృహన్ ముంబై మున్సిపల్ కార్పొరేషన్ (బీఎంసీ) మరో కీలక మౌలిక సదుపాయాల ప్రాజెక్టుకు శ్రీకారం చుట్టింది. వెర్సోవా, మధ్ ఐలాండ్ ప్రాంతాలను కలుపుతూ మలాడ్ క్రీక్‌పై రూ.2,395 కోట్ల అంచనా వ్యయంతో అత్యాధునిక కేబుల్-స్టేయ్డ్ వంతెన నిర్మాణానికి ప్రణాళికలు సిద్ధం చేసింది. ఈ వంతెన నిర్మాణం పూర్తయితే ప్రస్తుతం గంట నుంచి గంటన్నర వరకు పడుతున్న ప్రయాణ సమయం కేవలం 10 నిమిషాలకు తగ్గనుంది. ప్రస్తుతం వెర్సోవా, మధ్ ఐలాండ్ మధ్య ప్రత్యక్ష రహదారి మార్గం లేకపోవడంతో ప్రయాణికులు 18 నుంచి 20 కిలోమీటర్ల మేర చుట్టూ తిరిగి వెళ్లాల్సి వస్తోంది. ట్రాఫిక్ పరిస్థితులను బట్టి ఈ ప్రయాణానికి 60 నుంచి 90 నిమిషాల సమయం పడుతోంది. రెండు ప్రాంతాల మధ్య జెట్టీ సేవలు అందుబాటులో ఉన్నప్పటికీ అవి ఏడాదిలో కొన్ని నెలలు మాత్రమే పనిచేయడం, వర్షాకాలంలో నిలిచిపోవడం వల్ల ప్రజలకు పూర్తిస్థాయి ప్రయోజనం కలగడం లేదు.ఈ నేపథ్యంలో ప్రతిపాదిత వంతెన ముంబై ప్రజలకు కీలక ఉపశమనంగా మారనుంది. సుమారు 2.06 కిలోమీటర్ల పొడవుతో నిర్మించనున్న ఈ వంతెనను నాలుగు లేన్లతో రూపొందించనున్నారు. భవిష్యత్ ట్రాఫిక్ అవసరాలను దృష్టిలో ఉంచుకుని విశాలంగా నిర్మించే ఈ వంతెనలో పాదచారులు, సైక్లిస్టుల కోసం ప్రత్యేక మార్గాలు కూడా ఏర్పాటు చేయనున్నారు. వంతెనపై ఆధునిక లైటింగ్ వ్యవస్థలు, అత్యవసర సేవల సౌకర్యాలు కల్పించనున్నారు. దీని ద్వారా కేవలం రవాణా సౌకర్యాలు మెరుగుపడటమే కాకుండా మధ్ ఐలాండ్ ప్రాంత ప్రజలకు విద్య, వైద్యం, ఇతర అత్యవసర సేవలు మరింత వేగంగా అందుబాటులోకి రానున్నాయి. ప్రాంతీయ అభివృద్ధికి కూడా ఈ ప్రాజెక్టు కీలకంగా మారుతుందని అధికారులు భావిస్తున్నారు.
ప్రాజెక్టుకు సంబంధించి బీఎంసీ ఇప్పటికే నేల పరీక్షలు, సర్వేలు వంటి ప్రాథమిక పనులను పూర్తి చేసింది. అయితే ప్రధాన నిర్మాణ పనులు ప్రారంభించేందుకు అవసరమైన పర్యావరణ అనుమతులు, బాంబే హైకోర్టు తుది ఆమోదం కోసం ఎదురుచూస్తోంది. ఈ అంశంపై సెప్టెంబర్‌లో కీలక విచారణ జరిగే అవకాశం ఉన్నట్లు తెలుస్తోంది. అనుమతులు లభించిన వెంటనే వర్షాకాలం ముగిసిన తర్వాత నిర్మాణ పనులు ప్రారంభించాలని బీఎంసీ ప్రణాళిక రూపొందించింది. అన్ని ప్రక్రియలు సకాలంలో పూర్తైతే 2029 నాటికి ఈ అత్యాధునిక వంతెనను ప్రజలకు అందుబాటులోకి తీసుకురావాలని అధికారులు లక్ష్యంగా పెట్టుకున్నారు. ఈ ప్రాజెక్టు పూర్తయితే ముంబై నగర రవాణా రంగంలో మరో మైలురాయిగా నిలవనుంది.
Author: Prajaveek Shanam
