న్యూఢిల్లీ, ఆగస్టు 30 (ప్రజవీక్షణం ప్రతినిధి) : ప్రముఖ మసాలా బ్రాండ్‌ ఎవరెస్ట్‌కు చెందిన ఇంగువ ఉత్పత్తిపై భారత ఆహార భద్రత, ప్రమాణాల ప్రాధికార సంస్థ కీలక చర్యలు చేపట్టింది. ఎవరెస్ట్‌ తయారు చేసిన కొన్ని ఇంగువ నమూనాలు నిర్దేశిత నాణ్యత ప్రమాణాలకు అనుగుణంగా లేవని పరీక్షల్లో తేలడంతో, సంబంధిత ఉత్పత్తుల విక్రయాలను నిలిపివేయాలని ఆదేశించినట్లు తాజా నివేదికలు వెల్లడించాయి.
ఇంగువతో పాటు మరో సంస్థకు చెందిన ఇంగువ ఉత్పత్తుల్లోనూ ప్రమాణాల లోపాలు గుర్తించినట్లు సమాచారం. దీంతో మార్కెట్‌లో ఉన్న సంబంధిత ఉత్పత్తులను ఉపసంహరించుకోవాలని ఆదేశించినట్లు తెలుస్తోంది. వినియోగదారులకు నాణ్యమైన ఆహార ఉత్పత్తులు అందించడమే లక్ష్యంగా ఈ చర్యలు చేపట్టినట్లు అధికారులు తెలిపారు.
ఎవరెస్ట్‌కు చెందిన మరికొన్ని మసాలా ఉత్పత్తుల నాణ్యతపైనా అధికారులు పరిశీలనలు చేపట్టినట్లు సమాచారం. అయితే ఎవరెస్ట్‌ బ్రాండ్‌కు చెందిన అన్ని మసాలాలపై నిషేధం విధించినట్లు భావించరాదని, గుర్తించిన నిర్దిష్ట ఉత్పత్తులు లేదా బ్యాచ్‌లకే ఈ చర్యలు పరిమితమని నివేదికలు పేర్కొంటున్నాయి.
Author: Prajaveek Shanam
