హైదరాబాద్‌, ఆగస్టు 31 (ప్రజా వీక్షణం ప్రతినిధి): దక్షిణాది అగ్ర కథానాయికల్లో ఒకరిగా గుర్తింపు తెచ్చుకున్న కీర్తి సురేష్‌ వరుస సినిమాలతో ప్రేక్షకులను అలరిస్తున్నారు. ప్రస్తుతం ‘ది ప్యారడైజ్‌’ చిత్రంలో ప్రత్యేక గీతంలో సందడి చేయడానికి సిద్ధమవుతున్నారు. ఇదిలా ఉంటే.. ‘మహానటి’ కీర్తి సురేష్‌ తన అద్భుతమైన శారీరక మార్పుతో గతంలో అభిమానులను ఆశ్చర్యపరిచారు. ఓ సినిమా పాత్ర కోసం ఏకంగా 9 కిలోల బరువు తగ్గిన ఆమె.. ఎలాంటి కఠినమైన ఆహార నియమాలు పాటించకుండా, సరైన వ్యాయామం, సమతుల్య ఆహారంతోనే ఈ మార్పు సాధించినట్లు గతంలో ఓ ఇంటర్వ్యూలో వెల్లడించారు.
బరువు తగ్గే సమయంలో కీర్తి సురేష్‌ ప్రధానంగా కార్డియో వ్యాయామాలపై దృష్టి పెట్టారు. ప్రతిరోజూ క్రమం తప్పకుండా కార్డియో చేయడం ద్వారా శరీరంలోని కేలరీలను ఖర్చు చేశారు. అయితే ప్రారంభంలో ఎక్కువగా కార్డియో చేయడం వల్ల కండరాల ద్రవ్యరాశి తగ్గుతున్నట్లు గుర్తించారు. దీంతో తన వ్యాయామ విధానంలో మార్పులు చేసుకుని కార్డియోతో పాటు కండరాల బలోపేతానికి ఉపయోగపడే వ్యాయామాలను కూడా చేర్చుకున్నారు.
ప్రస్తుతం కార్డియోతో పాటు శక్తి పెంచే వ్యాయామాలు, యోగా వంటివి క్రమం తప్పకుండా చేస్తున్నట్లు సమాచారం. ఇవి శరీరాన్ని దృఢంగా ఉంచడంతో పాటు వశ్యతను పెంచడంలో సహాయపడుతున్నాయి. బరువు తగ్గేందుకు కీర్తి సురేష్‌ తీవ్రమైన ఆహార నియమాలు లేదా ప్రత్యేకమైన ఆహార విధానాలను ఆశ్రయించలేదని తెలుస్తోంది. అధిక మాంసకృత్తులు, తక్కువ పిండి పదార్థాలు ఉండే సమతుల్య ఆహారాన్ని తీసుకున్నారు.
ముఖ్యంగా ఎలాంటి మాంసకృత్తుల పొడులు లేదా పోషక పదార్థాల అదనపు మాత్రలు తీసుకోకుండా సహజమైన ఆహారానికే ప్రాధాన్యత ఇచ్చినట్లు సమాచారం. రోజుకు సుమారు 6 నుంచి 7 గుడ్డు తెల్లసొనలు తీసుకునేవారని తెలుస్తోంది. వీటితో పాటు పనీర్‌, టోఫు, సోయా, శనగలు, పప్పులు వంటి మాంసకృత్తులు అధికంగా ఉండే ఆహారాన్ని తీసుకున్నారు. ప్రాసెస్‌ చేసిన ఆహారాలు, చక్కెర, అధిక పిండి పదార్థాలు ఉన్న ఆహారాలకు దూరంగా ఉంటూ సహజమైన పోషకాహారాన్ని ఎంచుకున్నారు.
ఇష్టమైన ఆహారాన్ని పూర్తిగా మానేయాల్సిన అవసరం లేదని, శరీర తత్వానికి అనుగుణంగా సరైన పోషకాలు అందే ఆహారాన్ని తీసుకుంటూ క్రమం తప్పకుండా వ్యాయామం చేస్తే ఆరోగ్యకరమైన రీతిలో బరువు తగ్గవచ్చని కీర్తి సురేష్‌ గతంలో పేర్కొన్నట్లు సమాచారం. ఆమె ఫిట్‌నెస్‌ ప్రయాణం ప్రస్తుతం అభిమానులను ఆకట్టుకుంటోంది.
Author: Prajaveek Shanam
