- అక్టోబర్ నుంచి దశలవారీగా కొత్త పింఛన్ల పంపిణీ
- స్థానిక ఎన్నికల వాయిదాకు అవకాశం లేదన్న మంత్రి
- వైసీపీ ‘గొడ్డలి రాజకీయాలు’ సాగవని విమర్శ
- అధికారులు అప్రమత్తంగా ఉండాలని సూచన
అమరావతి, సెప్టెంబర్ 3, (ప్రజా వీక్షణం ప్రతినిధి): రాష్ట్ర మంత్రులతో విద్యాశాఖ మంత్రి నారా లోకేశ్ గురువారం కీలక సమావేశం నిర్వహించారు. ఈ సమావేశంలో రాబోయే స్థానిక సంస్థల ఎన్నికలకు కూటమి పార్టీల యంత్రాంగాన్ని పూర్తిస్థాయిలో సిద్ధం చేయడం, కొత్త పింఛన్ల పంపిణీ ప్రక్రియ, వివిధ శాఖల పనితీరు వంటి అంశాలపై విస్తృతంగా చర్చించారు. రాష్ట్రంలోని అర్హులైన ప్రతి ఒక్కరికీ సంక్షేమ ఫలాలు చేరేలా ప్రభుత్వం కట్టుబడి ఉందని లోకేశ్ స్పష్టం చేశారు. ప్రజల నుంచి అందుతున్న దరఖాస్తులను ఎప్పటికప్పుడు పరిశీలించి, అర్హత కలిగిన వారికి పారదర్శకంగా లబ్ధి చేకూర్చాలని మంత్రులకు సూచించారు. సంక్షేమ కార్యక్రమాల అమలులో ఎలాంటి నిర్లక్ష్యం చోటు చేసుకోకుండా చర్యలు తీసుకోవాలని ఆదేశించారు. అక్టోబర్ నెల నుంచి కొత్త పింఛన్ల పంపిణీ కార్యక్రమాన్ని దశలవారీగా ప్రారంభించనున్నట్లు లోకేశ్ వెల్లడించారు. రాష్ట్రవ్యాప్తంగా అర్హులైన ప్రతి ఒక్కరికీ పింఛన్ అందేలా వ్యవస్థను బలోపేతం చేయాలని సూచించారు. సంక్షేమ పథకాల అమలులో ప్రజలకు ఇబ్బందులు తలెత్తకుండా అధికారులు సమన్వయంతో పనిచేయాలని చెప్పారు. పింఛన్ దరఖాస్తుల పరిష్కారంలో జాప్యం లేకుండా చర్యలు తీసుకోవాలని, ప్రజల నమ్మకాన్ని నిలబెట్టే విధంగా వ్యవహరించాలని స్పష్టం చేశారు.
స్థానిక సంస్థల ఎన్నికల విషయంలో ప్రభుత్వం పూర్తిస్థాయి స్పష్టతతో ఉందని లోకేశ్ పేర్కొన్నారు. ఎట్టి పరిస్థితుల్లోనూ ఎన్నికలను వాయిదా వేసే ప్రసక్తే లేదని, అక్టోబర్ నాటికే సమగ్ర ఎన్నికల ప్రక్రియ పూర్తవుతుందని తేల్చిచెప్పారు. ప్రస్తుతం కోర్టుల్లో పెండింగ్‌లో ఉన్న అంశాలను ప్రభుత్వం చట్టబద్ధంగా వేగంగా పరిష్కరిస్తోందని వివరించారు. ఎన్నికల నిర్వహణలో ఎలాంటి ఆటంకాలు లేకుండా అవసరమైన చర్యలు తీసుకుంటున్నామని తెలిపారు. ఎన్నికల షెడ్యూల్‌ను కూడా లోకేశ్ ఈ సందర్భంగా వివరించారు. ముందుగా పురపాలక సంస్థల ఎన్నికలు నిర్వహించి, ఆ తర్వాత ఎంపీటీసీ, జెడ్పీటీసీ ఎన్నికలు, చివరిగా గ్రామ పంచాయతీ ఎన్నికలు నిర్వహిస్తామని చెప్పారు. అన్ని దశల్లో కూటమి అభ్యర్థుల విజయమే లక్ష్యంగా నాయకులు, కార్యకర్తలు సమన్వయంతో పనిచేయాలని పిలుపునిచ్చారు. స్థానిక సంస్థల్లో కూటమి బలాన్ని మరింత పెంచే దిశగా క్షేత్రస్థాయిలో పార్టీ యంత్రాంగం చురుకుగా వ్యవహరించాలని సూచించారు.
స్థానిక ఎన్నికలను వాయిదా వేయించి కేంద్ర ఫైనాన్స్ కమిషన్ నిధులు రాష్ట్రానికి అందకుండా చేయాలనే ఉద్దేశంతో వైసీపీ ‘గొడ్డలి రాజకీయాలు’ చేస్తోందని లోకేశ్ విమర్శించారు. రాష్ట్ర ప్రయోజనాలకు విరుద్ధంగా వ్యవహరించే రాజకీయ కుయుక్తులు ఎంతమాత్రం ఫలించవని మండిపడ్డారు. ప్రజలు అభివృద్ధి, సంక్షేమానికి ప్రాధాన్యం ఇస్తున్నారని, అందుకే కూటమి ప్రభుత్వ కార్యక్రమాలను మరింత సమర్థంగా ప్రజల్లోకి తీసుకెళ్లాలని సూచించారు. ఎన్నికల సమయంలో తప్పుడు ప్రచారాలను సమర్థంగా తిప్పికొట్టాలని నాయకులకు దిశానిర్దేశం చేశారు. విద్య, సంక్షేమ, వైద్య శాఖలను లక్ష్యంగా చేసుకుని ప్రత్యర్థులు చేస్తున్న ప్రచారం, సోషల్ మీడియా ట్రోలింగ్‌ల పట్ల మంత్రులు, అధికారులు అప్రమత్తంగా ఉండాలని లోకేశ్ హెచ్చరించారు. ప్రభుత్వానికి చెడ్డపేరు తెచ్చేలా ప్రవర్తించే లేదా విధులను సక్రమంగా నిర్వర్తించని అధికారులపై కఠిన చర్యలు తీసుకోవాలని స్పష్టం చేశారు. అలాగే సెప్టెంబర్ 9తో టీడీపీ అధినేత నారా చంద్రబాబు నాయుడిపై నమోదైన అక్రమ కేసులు, ఆయన నిర్బంధానికి మూడేళ్లు పూర్తవుతున్న నేపథ్యంలో ప్రత్యేక కార్యక్రమాలు నిర్వహించాలని నిర్ణయించినట్లు తెలిపారు. ఎల్‌నినో ప్రభావంతో భవిష్యత్తులో తలెత్తే నీటి కొరతను ముందస్తు ప్రణాళికలు, పొదుపు చర్యల ద్వారా అధిగమించేలా చర్యలు చేపట్టాలని కూడా మంత్రులకు సూచించారు.
Author: Prajaveek Shanam
