డీసీపల్లి, సెప్టెంబర్‌ 5 (ప్రజా వీక్షణం ప్రతినిధి)
ఆత్మకూరు నియోజకవర్గంలోని మర్రిపాడు మండలం డీసీపల్లి గ్రామంలో శ్రీ కోదండరామస్వామి దేవస్థాన నిర్మాణ పనులకు రాష్ట్ర మంత్రి ఆనం రామనారాయణరెడ్డి శాస్త్రోక్తంగా శంకుస్థాపన చేశారు. దేవాదాయ, ధర్మాదాయ శాఖకు చెందిన సీజీఎఫ్‌ నిధుల నుంచి రూ.1 కోటి వ్యయంతో ఆలయ నిర్మాణాన్ని చేపడుతున్నారు. వేద మంత్రోచ్చారణల మధ్య జరిగిన కార్యక్రమంలో మంత్రి పాల్గొని నిర్మాణ పనులను ప్రారంభించారు.
ఈ సందర్భంగా జాతీయ రహదారి కోనసముద్రం నుంచి డీసీపల్లి గ్రామ పొలిమేరల వరకు స్థానిక నాయకులు, ప్రజలు, భక్తులు మంత్రికి ఘన స్వాగతం పలికారు. భారీ గజమాలతో సత్కరిస్తూ జయజయధ్వానాల మధ్య ఆయనను ఆహ్వానించారు. పెద్ద సంఖ్యలో భక్తులు కార్యక్రమానికి హాజరై ఆలయ నిర్మాణ పనులు ప్రారంభం కావడంపై హర్షం వ్యక్తం చేశారు.
ఆధ్యాత్మిక వైభవం మరింత పెరుగుతుంది
డీసీపల్లి గ్రామంలో శ్రీ కోదండరామస్వామి ఆలయ నిర్మాణం పూర్తయితే ఆ ప్రాంతానికి ఆధ్యాత్మిక వైభవం మరింత పెరుగుతుందని మంత్రి ఆనం రామనారాయణరెడ్డి అన్నారు. గ్రామీణ ప్రాంతాల్లోని పురాతన దేవాలయాల అభివృద్ధికి ప్రభుత్వం ప్రత్యేక ప్రాధాన్యం ఇస్తోందని తెలిపారు. ఆలయాలు కేవలం పూజా స్థలాలే కాకుండా భారతీయ సంస్కృతి, సంప్రదాయాలకు కేంద్రాలుగా నిలుస్తాయని పేర్కొన్నారు.
పురాతన ఆలయాల పునరుద్ధరణ, ఆధ్యాత్మిక వారసత్వ పరిరక్షణే కూటమి ప్రభుత్వ లక్ష్యమని మంత్రి తెలిపారు. గ్రామీణ ప్రాంతాల్లోని దేవాలయాలను మౌలిక వసతులతో అభివృద్ధి చేసి భక్తులకు మెరుగైన సౌకర్యాలు కల్పించే దిశగా చర్యలు చేపడుతున్నామని చెప్పారు. భావితరాలకు మన సంస్కృతి, సంప్రదాయాలను అందించడంలో ఆలయాలు కీలక పాత్ర పోషిస్తాయని పేర్కొన్నారు.
భక్తుల చిరకాల కోరిక నెరవేర్చేలా..
దేవాదాయ శాఖ ఆధ్వర్యంలో రాష్ట్రవ్యాప్తంగా పలు ఆలయాల అభివృద్ధి పనులు కొనసాగుతున్నాయని మంత్రి వెల్లడించారు. భక్తుల అవసరాలకు అనుగుణంగా ఆలయ ప్రాంగణాల్లో సౌకర్యాలు కల్పించేందుకు ప్రభుత్వం నిధులు కేటాయిస్తోందన్నారు. డీసీపల్లి ఆలయ నిర్మాణం కూడా భక్తుల చిరకాల కోరికను నెరవేర్చే కార్యక్రమమని వివరించారు.శ్రీ సీతారామచంద్రస్వామి వారి దివ్య ఆశీస్సులు నియోజకవర్గ ప్రజలందరిపై ఎల్లప్పుడూ ఉండాలని మంత్రి ఆకాంక్షించారు. ఆలయ నిర్మాణం విజయవంతంగా పూర్తై భక్తులకు ఆధ్యాత్మిక కేంద్రంగా మారాలని ప్రార్థించారు.కార్యక్రమంలో స్థానిక ప్రజాప్రతినిధులు, దేవాదాయ శాఖ అధికారులు, గ్రామ పెద్దలు, భక్తులు పెద్ద సంఖ్యలో పాల్గొన్నారు.
Author: Prajaveek Shanam
