అక్టోబరు 3 (ప్రజా వీక్షణం
సినిమా కేవలం వినోదం మాత్రమే కాదు.. నటీనటులకు తమను తాము సవాల్‌ చేసుకునే వేదిక కూడా. అలాంటి విభిన్న పాత్రల్లో నటించి ప్రేక్షకులను ఆశ్చర్యపరిచిన కథానాయికల్లో అమలా పాల్‌ ఒకరు. ఆమె కెరీర్‌లో ప్రత్యేకంగా నిలిచిన చిత్రాల్లో 2019లో వచ్చిన తమిళ సినిమా ‘ఆడై’, తెలుగులో ‘ఆమె’ ఒకటి. ఈ సినిమాలోని ఓ కీలక సన్నివేశం అప్పట్లో దేశవ్యాప్తంగా చర్చకు దారితీసింది.
కథ విన్నప్పుడే ఎన్నో సందేహాలు
‘ఆడై’ కథను దర్శకుడు రత్నకుమార్‌ చెప్పినప్పుడు తనకు కథపై ఆసక్తి కలిగినప్పటికీ.. కీలకమైన సన్నివేశంపై ఎన్నో సందేహాలు తలెత్తాయని అమలా పాల్‌ గతంలో వెల్లడించింది. ఆ సన్నివేశం కథలో నిజంగా అవసరమా? సినిమా ప్రచారం కోసం మాత్రమే ఉపయోగిస్తున్నారా? అనే ప్రశ్నలు తనను వెంటాడినట్లు తెలిపింది. దర్శకుడి ఆలోచన, కథలోని సందర్భం, సన్నివేశం వెనుక ఉన్న భావోద్వేగాన్ని పూర్తిగా అర్థం చేసుకున్న తర్వాతే నటించేందుకు అంగీకరించినట్లు చెప్పింది.
రెండు నెలలు ఆలోచించిన అమలా
తాను వెంటనే నిర్ణయం తీసుకోలేదని, దర్శకుడు రత్నకుమార్‌తో పాటు చిత్రబృందంపై పూర్తి నమ్మకం ఏర్పడటానికి దాదాపు రెండు నెలల సమయం పట్టిందని అమలా పాల్‌ పేర్కొంది. ఒక నటిగా పాత్రకు అవసరమైన సన్నివేశం చేయడం ఒక విషయమైతే.. దాని ప్రభావం తన కెరీర్‌పై ఎలా ఉంటుందనే ఆలోచన మరోవైపు ఉందని చెప్పింది. ప్రేక్షకులు తనను ఒకే తరహా పాత్రలకు పరిమితం చేస్తారేమోనన్న భయం కూడా అప్పట్లో ఉన్నట్లు తెలిపింది.
సెట్‌లో ప్రత్యేక జాగ్రత్తలు
సన్నివేశం చిత్రీకరణ సమయంలో తనకు ఎలాంటి అసౌకర్యం కలగకుండా దర్శకుడు, కెమెరా విభాగం ప్రత్యేక జాగ్రత్తలు తీసుకున్నారని అమలా పాల్‌ తెలిపింది. సెట్‌లో అవసరమైనంత తక్కువ మంది సిబ్బందినే ఉంచి, తన వ్యక్తిగత గోప్యతకు ప్రాధాన్యం ఇచ్చారని చెప్పింది. అందువల్లే ఆ సన్నివేశాన్ని నటిగా పూర్తి చేయగలిగానని వివరించింది. అయితే ఇప్పుడు వెనక్కి తిరిగి చూస్తే.. అలాంటి సాహసం మరోసారి చేయకూడదనే నిర్ణయానికి వచ్చినట్లు అమలా పాల్‌ స్పష్టం చేసింది.
Author: Prajaveek Shanam
