– విధి నిర్వహణలో ప్రాణాలు కోల్పోయిన ఉద్యోగుల కుటుంబాలకు అండ
– పెండింగ్ దరఖాస్తుల పరిష్కారానికి ప్రత్యేక చర్యలు
– ఇప్పటివరకు 445 మందికి కారుణ్య నియామకాల కల్పన
అక్టోబర్ 5 (ప్రజా వీక్షణం ప్రతినిధి):
విధి నిర్వహణలో ప్రాణాలు కోల్పోయిన విద్యుత్ శాఖ ఉద్యోగుల కుటుంబాలకు ప్రభుత్వం అండగా నిలుస్తూ వారి భవిష్యత్తుకు భరోసా కల్పిస్తోందని విద్యుత్ శాఖ మంత్రి గొట్టిపాటి రవికుమార్ తెలిపారు. విశాఖపట్నంలోని ఏపీఈపీడీసీఎల్ కార్పొరేట్ కార్యాలయంలో నిర్వహించిన కార్యక్రమంలో 43 మంది అర్హులకు కారుణ్య నియామక పత్రాలను అందజేశారు. ఈ కార్యక్రమంలో పార్లమెంట్ సభ్యుడు భరత్, ఎమ్మెల్యే వెలగపూడి రామకృష్ణబాబు, తెలుగుదేశం పార్టీ రాష్ట్ర అధ్యక్షుడు పల్లా శ్రీనివాసరావు, ఏపీఈపీడీసీఎల్ సీఎండీ పృథ్వీతేజ్ ఇమ్మడి, ఉన్నతాధికారులు పాల్గొన్నారు. ఈ సందర్భంగా మంత్రి మాట్లాడుతూ కుటుంబానికి ఆధారంగా ఉన్న ఉద్యోగి మరణించిన తర్వాత ఆ కుటుంబం ఎదుర్కొనే ఆర్థిక, సామాజిక ఇబ్బందులను ప్రభుత్వం పూర్తిగా అర్థం చేసుకుంటోందన్నారు. అలాంటి కుటుంబాలకు ఉపాధి అవకాశాలు కల్పించడం ద్వారా వారి జీవనోపాధికి భరోసా ఇవ్వడం ప్రభుత్వ బాధ్యతగా భావిస్తున్నామని పేర్కొన్నారు. కారుణ్య నియామకాలు కేవలం ఉద్యోగాల కల్పన మాత్రమే కాకుండా బాధిత కుటుంబాలకు ఆత్మవిశ్వాసాన్ని అందించే చర్యగా నిలుస్తాయని తెలిపారు.
గతంలో వివిధ కారణాలతో పెండింగ్‌లో ఉన్న కారుణ్య నియామకాల దరఖాస్తులను ప్రత్యేకంగా పరిశీలించి పరిష్కరిస్తున్నామని మంత్రి వెల్లడించారు. అనేక సంవత్సరాలుగా ఎదురుచూస్తున్న కుటుంబాలకు న్యాయం జరిగేలా ప్రభుత్వం కట్టుబడి ఉందన్నారు. దరఖాస్తుల పరిశీలన ప్రక్రియను వేగవంతం చేసి అర్హులైన వారికి త్వరితగతిన నియామకాలు అందించేందుకు చర్యలు చేపట్టినట్లు వివరించారు. రాష్ట్రంలో విద్యుత్ సంస్థల పరిధిలో ఇప్పటివరకు 445 మందికి పైగా కారుణ్య నియామకాలు కల్పించినట్లు మంత్రి తెలిపారు. మరికొన్ని దరఖాస్తులు పరిశీలనలో ఉన్నాయని, అర్హతలు కలిగిన ప్రతి కుటుంబానికి న్యాయం జరిగేలా చర్యలు కొనసాగుతాయని పేర్కొన్నారు. ఉద్యోగి సేవలను గౌరవించడంతో పాటు వారి కుటుంబ సభ్యులకు భరోసా కల్పించడమే ఈ కార్యక్రమం ప్రధాన ఉద్దేశమని వివరించారు.
ముఖ్యమంత్రి నారా చంద్రబాబు నాయుడు నాయకత్వంలో ఉద్యోగుల సంక్షేమానికి ప్రభుత్వం అధిక ప్రాధాన్యం ఇస్తోందని మంత్రి అన్నారు. ఉద్యోగులు విధి నిర్వహణలో ఎదుర్కొనే ప్రమాదాలను దృష్టిలో ఉంచుకుని వారి కుటుంబాల భవిష్యత్తును సురక్షితం చేయడానికి అవసరమైన చర్యలు తీసుకుంటున్నామని తెలిపారు. ప్రభుత్వ నిర్ణయాల వల్ల అనేక కుటుంబాలు ఆర్థికంగా నిలదొక్కుకునే అవకాశం పొందుతున్నాయని పేర్కొన్నారు. కారుణ్య నియామక పత్రాలు అందుకున్న కుటుంబ సభ్యులు ప్రభుత్వానికి కృతజ్ఞతలు తెలిపారు. తమ కుటుంబాలకు కొత్త ఆశ, భరోసా కల్పించిన ఈ నిర్ణయం జీవితాల్లో కీలక మలుపుగా నిలుస్తుందని అన్నారు. భవిష్యత్తులో కూడా అర్హులైన ప్రతి కుటుంబానికి న్యాయం జరిగేలా ప్రభుత్వం చేపడుతున్న చర్యలు కొనసాగాలని కార్యక్రమంలో పలువురు ఆకాంక్షించారు.
Author: Prajaveek Shanam
