అక్టోబరు 5 (ప్రజా వీక్షణం ప్రతినిధి):
హీరోయిన్‌ రకుల్‌ ప్రీత్‌ సింగ్‌ పేరు ఇటీవల ఆదాయపు పన్ను శాఖ సోదాలకు సంబంధించిన వార్తల్లో వినిపిస్తోంది. దీనిపై రకుల్‌ స్పందిస్తూ.. ఆ సోదాలతో తనకు ఎలాంటి సంబంధం లేదని స్పష్టం చేసింది. వాస్తవాలను నిర్ధారించుకోకుండానే తన పేరును ఈ వ్యవహారంతో ముడిపెట్టి వార్తలు ప్రచురించారని ఆవేదన వ్యక్తం చేసింది. ఇలాంటి తప్పుడు ప్రచారం తన ప్రతిష్ఠను దెబ్బతీస్తుందని పేర్కొంది.
అక్రమ లావాదేవీలతో సంబంధం లేదని వెల్లడి
తాను 20 ఏళ్ల వయసు నుంచే పన్నులు చెల్లిస్తున్నానని రకుల్‌ తెలిపింది. తన ఆర్థిక వ్యవహారాలను చట్టబద్ధంగా నిర్వహిస్తున్నానని స్పష్టం చేసింది. అక్రమ విదేశీ నగదు బదిలీలతో తనకు ఎలాంటి సంబంధం లేదని, వ్యక్తిగతంగా కానీ.. ఏదైనా నిర్మాణ సంస్థ తరఫున కానీ ఇలాంటి లావాదేవీల్లో పాల్గొనలేదని పేర్కొంది. భారత్‌లో లేదా విదేశాల్లో ఇతరుల పేర్లతో బినామీ ఆస్తులు కలిగి ఉన్నానన్న ప్రచారాన్ని కూడా ఆమె ఖండించింది.
‘తప్పుడు ప్రచారం ఆపాలి’
తనపై వచ్చిన కథనాలను తప్పుడు, దురుద్దేశపూరిత, ఊహాజనిత కథనాలుగా రకుల్‌ అభివర్ణించింది. వార్తలు ప్రచురించే ముందు వాస్తవాలను నిర్ధారించుకోవాలని సూచించింది. తనపై తప్పుడు కథనాలు ప్రచురించిన వారు వాటిని ఉపసంహరించుకుని వాస్తవాలను స్పష్టం చేయాలని కోరింది.
ప్రతిష్ఠను దెబ్బతీయొద్దంటూ విజ్ఞప్తి
తాను సాయుధ దళాల కుటుంబ నేపథ్యం నుంచి వచ్చానని, ఎంతో కష్టపడి తన కెరీర్‌ను నిర్మించుకున్నానని రకుల్‌ పేర్కొంది. మీడియా సంస్థలు వాణిజ్య ప్రయోజనాల కోసం వాస్తవాలను పక్కన పెట్టకూడదని సూచించింది. వార్తల కోసం ఒక వ్యక్తి ప్రతిష్ఠ, జీవనోపాధిపై ప్రభావం చూపేలా వ్యవహరించడం సరికాదని తెలిపింది. తనపై జరుగుతున్న ప్రచారానికి సంబంధించి రకుల్‌ బహిరంగంగా స్పందించడంతో.. ఈ సోదాలతో తనకు ఎలాంటి సంబంధం లేదన్నది ఆమె స్పష్టం చేసినట్లయింది.
Author: Prajaveek Shanam
