స్థానిక ఎన్నికల్లో కూటమిని గెలిపించండి

• గ్రామాల అభివృద్ధిలో ప్రతి ఒక్కరూ భాగస్వాములు కావాలి
• జనసైనికుల త్యాగాలకు తగిన గుర్తింపు ఇవ్వాలి
• అడవితల్లి బాట 2.0 కింద రూ.2,052 కోట్లతో పనులు
• 2,569 అభివృద్ధి పనులకు శ్రీకారం
• రాష్ట్ర ఉప ముఖ్యమంత్రి పవన్‌ కల్యాణ్‌

కాకవాడ, అక్టోబర్ 11 (ప్రజా వీక్షణం ప్రతినిధి): రాబోయే స్థానిక సంస్థల ఎన్నికల్లో కూటమి అభ్యర్థులను గెలిపించేందుకు నాయకులు, కార్యకర్తలు సమష్టిగా కృషి చేయాలని రాష్ట్ర ఉప ముఖ్యమంత్రి పవన్‌ కల్యాణ్‌ పిలుపునిచ్చారు. కూటమిలోని అన్ని పార్టీల నాయకులు, జనసైనికులు, వీరమహిళలు పరస్పర సమన్వయంతో ముందుకు సాగుతూ గ్రామాల అభివృద్ధిలో భాగస్వాములు కావాలని సూచించారు. కూటమి ఏర్పాటు, విజయం కోసం జనసేన పార్టీ కార్యకర్తలు ఎన్నో త్యాగాలు చేశారని, వారి కృషిని గుర్తించి స్థానిక సంస్థల ఎన్నికల్లో సముచిత ప్రాతినిధ్యం కల్పించాలని స్పష్టం చేశారు. పార్టీ కోసం, కూటమి కోసం కష్టపడిన ప్రతి కార్యకర్తకు తగిన గుర్తింపు, గౌరవం దక్కాలని ఆకాంక్షించారు. ఆదివారం పోలవరం జిల్లా రంపచోడవరం నియోజకవర్గంలోని కాకవాడలో అడవితల్లి బాట 2.0 కార్యక్రమాన్ని ప్రారంభించిన అనంతరం నిర్వహించిన గ్రామసభలో ఆయన మాట్లాడారు.
2014 నుంచి రాష్ట్ర ప్రయోజనాలే లక్ష్యంగా జనసేన కార్యకర్తలు కూటమికి మద్దతుగా నిలిచారని పవన్‌ కల్యాణ్‌ పేర్కొన్నారు. పదవులను ఆశించకుండా పార్టీ కోసం, రాష్ట్ర భవిష్యత్తు కోసం వ్యక్తిగత ప్రయోజనాలను పక్కనపెట్టి పనిచేశారని తెలిపారు. చంద్రబాబు నాయుడు అరెస్టు సమయంలోనూ జనసైనికులు, వీరమహిళలు రోడ్లపైకి వచ్చి సంఘీభావం తెలిపారని గుర్తుచేశారు. కష్టకాలంలో అండగా నిలిచిన కార్యకర్తల త్యాగాలను ఎప్పటికీ మరచిపోకూడదన్నారు. పొత్తు ధర్మాన్ని గౌరవిస్తూ రాబోయే స్థానిక సంస్థల ఎన్నికల్లో జనసైనికులకు తగిన ప్రాతినిధ్యం కల్పించాలని కూటమి నాయకులకు సూచించారు. కార్యకర్తల నమ్మకాన్ని నిలబెట్టుకోవడం, వారి సేవలకు గుర్తింపు ఇవ్వడం ప్రతి నాయకుడి బాధ్యతగా పేర్కొన్నారు. గ్రామాల అభివృద్ధికి రాజకీయాలకు అతీతంగా అందరూ కలిసికట్టుగా పనిచేయాలని పిలుపునిచ్చారు.
గిరిజన గ్రామాలకు రహదారి సదుపాయాలు కల్పించి, వాటిని అభివృద్ధి పథంలోకి తీసుకురావడమే అడవితల్లి బాట కార్యక్రమం ప్రధాన లక్ష్యమని ఉప ముఖ్యమంత్రి వివరించారు. రహదారుల నిర్మాణంతో గిరిజన ప్రాంతాల్లో విద్య, వైద్యం, ఉపాధి, రవాణా, మార్కెట్‌ సదుపాయాలు మెరుగుపడతాయని తెలిపారు. ప్రధానమంత్రి నరేంద్ర మోదీ సహకారంతో, ముఖ్యమంత్రి చంద్రబాబు నాయుడు నాయకత్వంలో ప్రధానమంత్రి జనజాతి ఆదివాసీ న్యాయ మహా అభియాన్‌, ప్రధానమంత్రి గ్రామీణ రహదారుల పథకం, ఉపాధి హామీ పథకాల సమన్వయంతో ఈ కార్యక్రమాన్ని అమలు చేస్తున్నట్లు పేర్కొన్నారు. అల్లూరి సీతారామరాజు, పార్వతీపురం మన్యం, పోలవరం, శ్రీకాకుళం, విజయనగరం, నంద్యాల, ఏలూరు జిల్లాల్లో మొదటి విడత పనులు చేపట్టినట్లు తెలిపారు. ఈ కార్యక్రమం కింద 858 గిరిజన ఆవాసాలకు 1,662 కిలోమీటర్ల మేర రహదారుల నిర్మాణానికి రూ.1,406 కోట్లతో పనులు చేపట్టినట్లు వెల్లడించారు.
అడవితల్లి బాట కార్యక్రమానికి కొనసాగింపుగా రెండో విడతలో మరో 1,341 గిరిజన ఆవాసాలకు 1,976 కిలోమీటర్ల మేర రహదారులు, 45 వంతెనల నిర్మాణం కోసం రూ.2,052 కోట్లతో మొత్తం 2,569 పనులకు మంజూరు ఇచ్చినట్లు పవన్‌ కల్యాణ్‌ తెలిపారు. గిరిజన ప్రాంతాల్లో రహదారుల నిర్మాణం సాధారణ ప్రాంతాలతో పోలిస్తే ఎంతో క్లిష్టమైన ప్రక్రియ అని వివరించారు. కొండల మధ్య రహదారులు నిర్మించేందుకు భారీ బండరాళ్లను తొలగించడం, అవసరమైన చోట నియంత్రిత పేలుళ్ల ద్వారా రాళ్లను తొలగించడం, కొండ వాలులను స్థిరీకరించడం వంటి పనులు చేపట్టాల్సి ఉంటుందని పేర్కొన్నారు. రహదారికి పటిష్ఠమైన పునాది వేసిన తర్వాత కంకర పొరలు ఏర్పాటు చేసి తారు రహదారిని నిర్మించాల్సి ఉంటుందని తెలిపారు. ఈ సవాళ్లను అధిగమించి గిరిజన గ్రామాలకు రహదారి సౌకర్యాలు కల్పించేందుకు ప్రభుత్వం కృషి చేస్తోందన్నారు.
2018లో చేపట్టిన పోరాట యాత్ర సందర్భంగా ఉత్తరాంధ్ర ఏజెన్సీ ప్రాంతాల్లోని పలు గిరిజన గ్రామాలను సందర్శించి ప్రజలు ఎదుర్కొంటున్న సమస్యలను ప్రత్యక్షంగా తెలుసుకున్నానని పవన్‌ కల్యాణ్‌ పేర్కొన్నారు. రహదారులు లేకపోవడం వల్ల గిరిజన ప్రాంతాలు అభివృద్ధికి దూరంగా ఉన్న పరిస్థితులను గుర్తించానన్నారు. అధికారంలోకి వచ్చిన తర్వాత గిరిజన గ్రామాలకు రవాణా సౌకర్యాలు కల్పించేందుకు చర్యలు చేపట్టామని తెలిపారు. గ్రామాల్లో రహదారులు నిర్మించడం ద్వారా విద్యార్థులు పాఠశాలలకు చేరుకోవడం, రోగులు ఆసుపత్రులకు వెళ్లడం, రైతులు తమ ఉత్పత్తులను మార్కెట్లకు తరలించడం సులభతరం అవుతుందని వివరించారు. గత వైఎస్సార్‌ కాంగ్రెస్‌ పార్టీ ప్రభుత్వ హయాంలో గిరిజన గ్రామాల అభివృద్ధి నిర్లక్ష్యానికి గురైందని విమర్శించారు. ప్రజలకు అవసరమైన మౌలిక సదుపాయాల కంటే పార్టీ రంగుల కోసం వందల కోట్ల రూపాయలు ఖర్చు చేశారని ఆరోపించారు. ప్రస్తుత కూటమి ప్రభుత్వం రాజకీయాలకు అతీతంగా గ్రామీణాభివృద్ధికి నిధులు కేటాయిస్తూ రహదారులు, ఉపాధి, వైద్య సదుపాయాల మెరుగుదలకు చర్యలు చేపడుతోందని తెలిపారు.

Author: Prajaveek Shanam