న్యూఢిల్లీ, అక్టోబరు 12 (ప్రజా వీక్షణం ప్రతినిధి): పండగల సీజన్‌ నేపథ్యంలో ఆన్‌లైన్‌ విక్రయాలు ఊపందుకున్నాయి. అమెజాన్‌, ఫ్లిప్‌కార్ట్‌, మీషో, అజియో తదితర అంతర్జాల వాణిజ్య వేదికల ద్వారా పండగ విక్రయాలు ప్రారంభమైన తొలి రెండు రోజుల్లోనే సుమారు రూ.24 వేల కోట్ల విలువైన ఉత్పత్తులు అమ్ముడైనట్లు కన్సల్టెన్సీ సంస్థ రెడ్‌సీర్‌ అంచనా వేసింది. సాధారణ రోజులతో పోలిస్తే ఈ రెండు రోజుల్లో ఆర్డర్ల సంఖ్య ఆరు రెట్లు పెరిగినట్లు వెల్లడించింది.
కోట్ల సంఖ్యలో ఆర్డర్లు
పండగ విక్రయాల తొలి రెండు రోజుల్లో సుమారు 6 నుంచి 6.5 కోట్ల మంది వినియోగదారులు దాదాపు 8 నుంచి 9 కోట్ల ఆర్డర్లు చేసినట్లు రెడ్‌సీర్‌ తెలిపింది. పండగ ఆఫర్లు, ప్రత్యేక రాయితీలు, వివిధ ఉత్పత్తులపై ఆకర్షణీయమైన ధరలు ఆన్‌లైన్‌ కొనుగోళ్లు పెరగడానికి కారణమవుతున్నాయి.
స్మార్ట్‌ఫోన్లకు భారీ డిమాండ్‌
మొత్తం అమ్మకాల్లో స్మార్ట్‌ఫోన్ల వాటా అత్యధికంగా 30 నుంచి 40 శాతం వరకు ఉన్నట్లు అంచనా. వీటి విక్రయాల విలువ సుమారు రూ.9,100 కోట్ల నుంచి రూ.9,600 కోట్ల వరకు ఉంటుందని రెడ్‌సీర్‌ పేర్కొంది. కన్స్యూమర్‌ ఎలక్ట్రానిక్స్‌, టీవీలు, రిఫ్రిజిరేటర్లు, ఏసీలు వంటి గృహోపకరణాల వాటా 25 నుంచి 27 శాతంగా ఉంది. వీటి అమ్మకాల విలువ రూ.6,000 కోట్ల నుంచి రూ.6,500 కోట్ల వరకు ఉంటుందని అంచనా వేసింది.
ఫ్యాషన్‌ ఉత్పత్తులకూ ఆదరణ
దుస్తులు, ఇతర ఫ్యాషన్‌ ఉత్పత్తుల విక్రయాలు మొత్తం అమ్మకాల్లో 15 నుంచి 18 శాతం వాటాను కలిగి ఉన్నట్లు సంస్థ వెల్లడించింది. ఈ విభాగంలో సుమారు రూ.3,630 కోట్ల నుంచి రూ.4,350 కోట్ల విలువైన ఉత్పత్తులు అమ్ముడైనట్లు అంచనా వేసింది. పండగ సీజన్‌లో ఆన్‌లైన్‌ కొనుగోళ్లకు పెరుగుతున్న ఆదరణ ఈ విక్రయాల ద్వారా స్పష్టమవుతోంది.
Author: Prajaveek Shanam
