గూడూరు ప్రజా దర్బార్‌లో ప్రజా సమస్యల పరిష్కారానికి ప్రత్యేక దృష్టి
– ఎమ్మెల్యే డాక్టర్ పాశిం సునీల్ కుమార్
గూడూరు ఏప్రిల్ 24 (ప్రజా వీక్షణం)
నెల్లూరు జిల్లా గూడూరు మండలం ప్రజల సమస్యలను నేరుగా తెలుసుకుని వాటికి తక్షణ పరిష్కారం అందించాలనే లక్ష్యంతో నిర్వహిస్తున్న ప్రజా దర్బార్ – గ్రీవెన్స్ డే కార్యక్రమం గూడూరు మండలంలో నిర్వహించబడింది. ఈ కార్యక్రమంలో భాగంగా నియోజకవర్గ విజన్ యాక్షన్ ప్లాన్ యూనిట్‌లో పెద్ద సంఖ్యలో ప్రజలు హాజరై తమ సమస్యలను అర్జీల రూపంలో సమర్పించారు.ఈ సందర్భంగా శాసన సభ్యులు మరియు రాష్ట్ర పార్టీ ప్రధాన కార్యదర్శి పాశిం సునీల్ కుమార్ స్వయంగా ప్రజల నుండి అర్జీలను స్వీకరించి, ప్రతి సమస్యను శ్రద్ధగా విన్నారు. ప్రజలు భూసంబంధిత సమస్యలు, పింఛన్లు, రేషన్ కార్డులు, గృహాలు, రోడ్లు, తాగునీరు, విద్యుత్ వంటి అనేక అంశాలపై తమ వినతులను తెలియజేశారు.
అందిన ప్రతి అర్జీని సంబంధిత శాఖ అధికారులకు వెంటనే పంపిస్తూ, సమస్యలను ఆలస్యం లేకుండా త్వరితగతిన పరిష్కరించాలని ఆయన స్పష్టం చేశారు. ప్రజలు ఇబ్బందులు పడకుండా, వారి సమస్యలకు సమయానుకూలంగా పరిష్కారం అందించడం ప్రభుత్వ ప్రధాన బాధ్యత అని తెలిపారు. పాశిం సునీల్ కుమార్ మాట్లాడుతూ, “ప్రజల వద్దకు ప్రభుత్వం చేరాలనే లక్ష్యంతో ఈ ప్రజా దర్బార్ కార్యక్రమాలు నిర్వహిస్తున్నాం. ప్రజల సమస్యలు ఎక్కడ ఉన్నాయో అక్కడే పరిష్కారం అందించాలి. ప్రతి అర్జీపై సమగ్రంగా పరిశీలించి, అర్హులకు న్యాయం జరిగేలా చర్యలు తీసుకుంటాం” అని పేర్కొన్నారు.అధికారులు ప్రజల సమస్యలను ప్రాధాన్యతగా తీసుకుని, నిర్లక్ష్యం లేకుండా వెంటనే స్పందించాలని ఆయన సూచించారు. అలాగే సమస్యల పరిష్కారంలో ఎలాంటి ఆలస్యం జరిగితే బాధ్యులపై చర్యలు తీసుకుంటామని హెచ్చరించారు.ఈ సందర్భంగా సమస్యలపై వచ్చిన అర్జీలకు ఎప్పటికప్పుడు స్పందిస్తూ, వాటిని సమర్థవంతంగా పరిష్కరిస్తున్న అన్ని శాఖల అధికారులకు ఎమ్మెల్యే ప్రత్యేకంగా ధన్యవాదాలు తెలిపారు. ప్రజల సమస్యలపై అధికారులు చూపుతున్న స్పందన విశేషమని, ఇదే విధంగా ముందుకు సాగాలని ఆయన అభినందించారు.ఈ కార్యక్రమంలో మండల స్థాయి అధికారులు, ప్రజా ప్రతినిధులు, పార్టీ నాయకులు మరియు పెద్ద సంఖ్యలో ప్రజలు పాల్గొన్నారు. ప్రజలు తమ సమస్యలను నేరుగా ఎమ్మెల్యే దృష్టికి తీసుకెళ్లగలిగినందుకు సంతృప్తి వ్యక్తం చేశారు.
Author: Prajaveek Shanam
