కర్ణాటక రాష్ట్రంలోని బెంగళూరు నగరంలో ఆరేళ్ల బాలిక మృతి కేసు సంచలనం రేపుతోంది. బాలిక మరణం సహజసిద్ధంగా జరగలేదని అనుమానాలు వ్యక్తమవడంతో పోలీసులు కేసు నమోదు చేసి దర్యాప్తు చేపట్టారు.
పోలీసుల వివరాల ప్రకారం, దావణగెరెకు చెందిన ప్రవీణ్, ప్రియాంక దంపతులకు 17 ఏళ్ల క్రితం వివాహం జరిగింది. వీరికి 15 ఏళ్ల కుమారుడు, 6 ఏళ్ల కుమార్తె ఉన్నారు. కాడుగోడి ప్రాంతంలో నివసిస్తున్న సమయంలో ప్రియాంకకు తన బాల్య స్నేహితుడు మోహన్‌తో పరిచయం ఏర్పడి, అది సన్నిహిత సంబంధంగా మారినట్లు తెలుస్తోంది.
కుటుంబ సభ్యుల కథనం ప్రకారం, ఈ విషయమై భార్యాభర్తల మధ్య విభేదాలు తలెత్తడంతో ప్రియాంక తన కుమారుడిని భర్త వద్దే ఉంచి, కుమార్తెతో కలిసి వేరుగా నివసించడం ప్రారంభించింది. అనంతరం మోహన్‌తో కలిసి సహజీవనం చేస్తున్నట్లు సమాచారం.
మూడు నెలల క్రితం తన కుమార్తె మరణించిందని ప్రియాంక ఫోన్ ద్వారా తెలియజేసి, ఆసుపత్రి నుంచి పొందిన మృతదేహ పరీక్ష నివేదికను ప్రవీణ్‌కు అందజేసింది. అయితే ఆ నివేదికపై అనుమానం వ్యక్తం చేసిన ప్రవీణ్, విదేశాల్లో ఉన్న తన వైద్య మిత్రుడికి పంపించాడు. నివేదికలో పలు లోపాలు ఉన్నాయని, బాలిక మరణానికి పేర్కొన్న కారణాలపై సందేహాలు ఉన్నాయని అతడు సూచించినట్లు సమాచారం.
దీంతో ప్రవీణ్ కాడుగోడి పోలీస్ స్టేషన్‌లో ఫిర్యాదు చేయగా, పోలీసులు కేసు నమోదు చేసి దర్యాప్తు ప్రారంభించారు. విచారణలో భాగంగా మోహన్‌ను అదుపులోకి తీసుకుని ప్రశ్నిస్తున్నట్లు తెలుస్తోంది. మరోవైపు ప్రియాంక పరారీలో ఉన్నట్లు సమాచారం.
అలాగే వివాదాస్పద మృతదేహ పరీక్ష నివేదిక జారీ చేసిన ఆసుపత్రిపై కూడా పోలీసులు కేసు నమోదు చేసి విచారణ చేపట్టినట్లు తెలుస్తోంది. బాలిక మృతి వెనుక అసలు కారణాలు ఏమిటన్నది దర్యాప్తు పూర్తయిన తర్వాతే స్పష్టత రానుంది.
Author: Prajaveek Shanam
