న్యూఢిల్లీ, ఆగస్టు 21 (ప్రజా వీక్షణం ): టోల్ గేట్ల సమీపంలో నివసించే వాహనదారులకు కేంద్ర ప్రభుత్వం ఊరట కలిగించింది. ఇకపై ప్రతిసారీ టోల్ చెల్లించాల్సిన అవసరం లేకుండా నెల రోజుల పాటు అపరిమితంగా ప్రయాణించే అవకాశం కల్పించింది. నేషనల్‌ హైవేస్‌ అథారిటీ ఆఫ్‌ ఇండియా డిజిటల్‌ ఫాస్టాగ్‌ లోకల్‌ పాస్‌ విధానాన్ని అందుబాటులోకి తీసుకొచ్చింది. తాజాగా దేశవ్యాప్తంగా 121 టోల్ ప్లాజాలకు ఈ విధానాన్ని వర్తింపజేస్తూ నిర్ణయం తీసుకుంది.
20 కిలోమీటర్ల పరిధిలో ఉంటే అవకాశం
టోల్ ప్లాజా నుంచి 20 కిలోమీటర్ల పరిధిలో నివసించే వాహనదారులు లోకల్‌ పాస్‌ పొందేందుకు అర్హులు. ఈ పాస్‌ ధర రూ.350 నుంచి ప్రారంభమవుతుంది. వాహనం కేటగిరీని బట్టి పాస్‌ ధర మారుతుంది. పాస్‌ తీసుకున్న తర్వాత నెల రోజుల పాటు సంబంధిత టోల్ ప్లాజా మీదుగా ఎన్నిసార్లు ప్రయాణించినా ప్రత్యేకంగా టోల్ చెల్లించాల్సిన అవసరం ఉండదు. రోజువారీ పనులు, ఇతర సాధారణ అవసరాల కోసం టోల్ ప్లాజా మీదుగా తరచూ రాకపోకలు సాగించే వారికి ఈ విధానం ప్రయోజనకరంగా ఉంటుంది.
121 టోల్ ప్లాజాల్లో అమలు
ప్రస్తుతం ఈ లోకల్‌ పాస్‌ దేశవ్యాప్తంగా 121 టోల్ ప్లాజాల వద్ద మాత్రమే అందుబాటులో ఉంది. కాబట్టి వాహనదారులు తాము తరచుగా ప్రయాణించే టోల్ ప్లాజా వద్ద ఈ సదుపాయం అమల్లో ఉందో లేదో ముందుగా తెలుసుకోవాలి. అన్ని టోల్ ప్లాజాలకు ఈ విధానం వర్తించదని అధికారులు స్పష్టం చేస్తున్నారు.
రాజమార్గ్‌ యాత్ర యాప్‌లో దరఖాస్తు
లోకల్‌ పాస్‌ను కేంద్ర ప్రభుత్వానికి చెందిన రాజమార్గ్‌ యాత్ర యాప్‌ ద్వారా పొందవచ్చు. యాప్‌లోని జీఐఎస్‌ ఆధారిత ధ్రువీకరణ వ్యవస్థ ద్వారా వాహనదారుడు సంబంధిత టోల్ ప్లాజాకు 20 కిలోమీటర్ల పరిధిలో నివసిస్తున్నారా లేదా అనేది గుర్తిస్తుంది. అడ్రస్‌, వాహన వివరాలు, ఫాస్టాగ్‌ వంటి సమాచారాన్ని డిజిలాకర్‌, వాహన్‌ వంటి ప్రభుత్వ ప్లాట్‌ఫామ్‌ల ద్వారా ధ్రువీకరిస్తుంది. దీంతో అడ్రస్‌ ప్రూఫ్‌ కోసం ప్రత్యేకంగా భౌతిక పత్రాలు సమర్పించాల్సిన అవసరం ఉండదు.
Author: Prajaveek Shanam
