కొలంబో ఆగస్టు 24 (ప్రజా వీక్షణం ప్రతినిధి): కొలంబో టెస్టులో భారత జట్టు భారీ స్కోరుతో తొలి ఇన్నింగ్స్‌ను డిక్లేర్ చేసింది. తొలి రోజు దేవదత్ పడిక్కల్ (117) శతకంతో పటిష్టమైన పునాది వేయగా.. రెండో రోజు ధ్రువ్ జురెల్ (115 నాటౌట్), రిషభ్ పంత్ (63) శ్రీలంక బౌలర్లపై విరుచుకుపడ్డారు. ఏడో వికెట్‌కు ఈ జోడీ సెంచరీ భాగస్వామ్యంతో టీమిండియాను భారీ స్కోరు దిశగా నడిపించింది. జురెల్ రెండో శతకం పూర్తి చేసిన కాసేపటికే కెప్టెన్ శుభ్‌మన్ గిల్ ఇన్నింగ్స్‌ను డిక్లేర్ చేశాడు.తొలి టెస్టులో విజయం సాధించి జోరుమీదున్న భారత జట్టు.. కొలంబోలోనూ ఆధిపత్యం ప్రదర్శించింది. ఓవర్‌నైట్ స్కోరు 300/5తో రెండో రోజు ఆట ప్రారంభించిన టీమిండియాకు పంత్, జురెల్ కీలకంగా నిలిచారు. లంక పేస్, స్పిన్ బౌలర్లను సమర్థంగా ఎదుర్కొంటూ పరుగుల వరద పారించారు.తొలి సెషన్‌లో పంత్ దూకుడుగా బ్యాటింగ్ చేయగా.. జురెల్ తనదైన శైలిలో నిలకడగా ఆడాడు. టీ విరామం అనంతరం వర్షం కారణంగా ఆట ఆలస్యమైనప్పటికీ జురెల్ ఏమాత్రం తడబడకుండా సెంచరీ పూర్తి చేశాడు. టెస్టుల్లో అతడికి ఇది రెండో శతకం. జురెల్ సెంచరీ పూర్తయిన అనంతరం భారత్ స్కోరు 500 దాటడంతో గిల్ ఇన్నింగ్స్‌ను డిక్లేర్ చేశాడు.పంత్ దూకుడుతొలి రోజు మణికట్టు గాయంతో రిటైర్డ్ హర్ట్ అయిన రిషభ్ పంత్.. రెండో రోజు తిరిగి క్రీజులోకి వచ్చి శ్రీలంక బౌలర్లపై ఎదురుదాడికి దిగాడు. షార్ట్‌పిచ్ బంతులను ధీటుగా ఎదుర్కొంటూ భారీ సిక్సర్లతో అభిమానులను అలరించాడు. పంత్, జురెల్ జోడీ దూకుడుతో లంచ్ సమయానికి భారత్ 6 వికెట్ల నష్టానికి 419 పరుగులు చేసింది.లంచ్ తర్వాత తొలి బంతికే పంత్ 63 పరుగుల వ్యక్తిగత స్కోరు వద్ద ఔటయ్యాడు. అనంతరం మానవ్ సుతార్‌తో కలిసి జురెల్ ఇన్నింగ్స్‌ను ముందుకు నడిపించాడు. 18 పరుగులు చేసిన సుతార్ ఔటైన తర్వాత మహమ్మద్ సిరాజ్‌తో కలిసి జురెల్ జట్టు స్కోరును 500 దాటించాడు.వర్షం కారణంగా మరోసారి ఆటకు అంతరాయం ఏర్పడినప్పటికీ.. తిరిగి ఆట ప్రారంభమైన తర్వాత సింగిల్ తీసి జురెల్ తన రెండో టెస్టు శతకాన్ని పూర్తి చేశాడు. అనంతరం సిరాజ్ వికెట్ కోల్పోవడంతో భారత్ 503/9 వద్ద తొలి ఇన్నింగ్స్‌ను డిక్లేర్ చేసింది. శ్రీలంక బౌలర్లలో అసితా ఫెర్నాండో నాలుగు వికెట్లు పడగొట్టగా.. ప్రభాత్ జయసూర్య, కేశర నువంత చెరో రెండు వికెట్లు, లహిరు కుమార ఒక వికెట్ తీశారు.
Author: Prajaveek Shanam
