న్యూఢిల్లీ, ఆగస్టు 24 (ప్రజా వీక్షణం ప్రతినిధి): దేశంలోనే అతిపెద్ద బీమా సంస్థ అయిన లైఫ్‌ ఇన్సూరెన్స్‌ కార్పొరేషన్‌ ఆఫ్‌ ఇండియా (ఎల్‌ఐసీ) వివిధ వర్గాల ప్రజలకు అనేక రకాల పాలసీలను అందిస్తోంది. అందులో ప్రముఖమైన పథకాల్లో ఎల్‌ఐసీ జీవన్‌ లక్ష్య కూడా ఒకటి. జీవిత బీమాతో పాటు పొదుపు ప్రయోజనాలను అందించే ఈ పాలసీలో రోజుకు సుమారు రూ.172 చొప్పున ఆదా చేస్తే.. పాలసీ నిబంధనలు, బోనస్‌ల ఆధారంగా మెచ్యూరిటీ సమయంలో సుమారు రూ.28.50 లక్షల వరకు పొందే ఉదాహరణ ఉంది.
ఎల్‌ఐసీ జీవన్‌ లక్ష్య నాన్‌-లింక్డ్‌, పార్టిసిపేటింగ్‌, వ్యక్తిగత జీవిత బీమా పథకం. ఈ పాలసీలో పాలసీ కాలంలో బీమా చేసిన వ్యక్తి మరణిస్తే.. నిబంధనల ప్రకారం నామినీకి వార్షిక ఆదాయ ప్రయోజనం అందుతుంది. ప్రాథమిక హామీ మొత్తంలో 10 శాతం చొప్పున వార్షికంగా చెల్లింపులు జరిగే విధానం ఇందులో ఉంది. పాలసీ గడువు ముగిసిన తర్వాత నిర్దిష్ట మెచ్యూరిటీ ప్రయోజనం లభిస్తుంది.
పాలసీలో కనీస ప్రాథమిక హామీ మొత్తం రూ.2 లక్షలు కాగా, గరిష్ట మొత్తంపై నిర్దిష్ట పరిమితి లేదు. పాలసీ కాలపరిమితి 13 నుంచి 25 సంవత్సరాల వరకు ఉంటుంది. ప్రీమియం చెల్లింపు కాలం పాలసీ కాలపరిమితి కంటే మూడు సంవత్సరాలు తక్కువగా ఉంటుంది. ఉదాహరణకు 25 సంవత్సరాల పాలసీ తీసుకుంటే 22 సంవత్సరాల పాటు ప్రీమియం చెల్లించాలి.
18 నుంచి 50 సంవత్సరాల వయస్సు ఉన్నవారు ఈ పాలసీని తీసుకునే అవకాశం ఉంది. గరిష్ట మెచ్యూరిటీ వయస్సు 65 సంవత్సరాలు. ప్రీమియంను నెలవారీ, త్రైమాసిక, అర్ధవార్షిక లేదా వార్షిక ప్రాతిపదికన చెల్లించే సదుపాయం ఉంది.
ఉదాహరణకు 29 ఏళ్ల వ్యక్తి రూ.15 లక్షల ప్రాథమిక హామీ మొత్తంతో 25 సంవత్సరాల కాలానికి జీవన్‌ లక్ష్య పాలసీ తీసుకున్నట్లు భావిస్తే.. ప్రీమియం చెల్లింపు కాలం 22 సంవత్సరాలుగా ఉంటుంది. నెలకు సుమారు రూ.5,169 ప్రీమియం చెల్లించాల్సి ఉంటుంది. అంటే రోజుకు సుమారు రూ.172 ఆదా చేసినట్లవుతుంది. 25 సంవత్సరాల పాలసీ కాలం పూర్తయ్యే నాటికి బోనస్‌లతో కలిపి సుమారు రూ.28.50 లక్షల వరకు మొత్తం లభించే ఉదాహరణను అందిస్తున్నారు.
అయితే వాస్తవ ప్రయోజనం పాలసీ నిబంధనలు, బోనస్‌లు, వయస్సు, హామీ మొత్తం, ప్రీమియం చెల్లింపు విధానం తదితర అంశాలపై ఆధారపడి ఉంటుంది. అలాగే ప్రీమియంపై తొలి సంవత్సరం 4.5 శాతం, రెండో సంవత్సరం నుంచి 2.25 శాతం చొప్పున జీఎస్టీ వర్తిస్తుందని ఇచ్చిన వివరాల్లో పేర్కొన్నారు.
Author: Prajaveek Shanam
