న్యూఢిల్లీ ఆగస్టు 26 (ప్రజా వీక్షణం ప్రతినిధి): మహిళల ఢిల్లీ ప్రీమియర్ లీగ్‌ (డీపీఎల్‌) 2026లో తన వినూత్న ‘6-7’ సెలబ్రేషన్‌తో వైరల్‌గా మారిన ఢిల్లీ లెగ్‌స్పిన్నర్‌ మేధావి బిధూరి మరోసారి వార్తల్లో నిలిచింది. ఈసారి ఆమె టీమిండియా స్టార్‌ విరాట్‌ కోహ్లీకి చేసిన రిక్వెస్ట్‌ ఆసక్తికరంగా మారింది. ‘‘విరాట్‌ కోహ్లీ నన్ను సోషల్‌ మీడియాలో ఫాలో అవ్వాలి’’ అనేది తన కోరిక అని మేధావి తెలిపింది.
ఆగస్టు 20న జరిగిన డీపీఎల్‌ మ్యాచ్‌లో సెంట్రల్‌ ఢిల్లీ క్వీన్స్‌ తరఫున ఆడిన మేధావి.. సౌత్‌ ఢిల్లీ సూపర్‌స్టార్జ్‌ బ్యాటర్‌ నిషికా సింగ్‌ను ఔట్‌ చేసింది. వెంటనే ఆమె చేసిన ‘6-7’ సెలబ్రేషన్‌ సోషల్‌ మీడియాలో వైరల్‌గా మారింది. ఆ మ్యాచ్‌లో 4 ఓవర్లు వేసిన మేధావి 24 పరుగులిచ్చి 2 వికెట్లు తీసింది. ఆమె జట్టు ఓడిపోయినా.. మేధావి మాత్రం తన సెలబ్రేషన్‌తో ప్రత్యేక ఆకర్షణగా నిలిచింది.
67 జెర్సీతో ‘6-7’
మేధావి ధరించే జెర్సీ నంబర్‌ 67. తొలుత 12వ నంబర్‌ జెర్సీని తీసుకోవాలని భావించినా.. అది అప్పటికే మరో ప్లేయర్‌కు కేటాయించడంతో 67ను ఎంచుకుంది. అనంతరం తన చెల్లెలి సూచనతో ట్రెండింగ్‌లో ఉన్న ‘6-7’ను వికెట్‌ సెలబ్రేషన్‌గా మార్చుకుంది. జెర్సీ నంబర్‌, సెలబ్రేషన్‌ రెండూ ఒకేలా ఉండటంతో అది ఆమెకు ప్రత్యేక గుర్తింపుగా మారింది.
ఈ సెలబ్రేషన్‌ క్రేజ్‌ ఎంత పెరిగిందంటే.. టీమిండియా సీనియర్‌ స్పిన్నర్‌ యుజ్వేంద్ర చాహల్‌ కూడా ఇంగ్లాండ్‌లో కౌంటీ క్రికెట్‌ ఆడుతూ ‘6-7’ స్టైల్‌లో సెలబ్రేట్‌ చేశాడు. దీంతో మేధావి చేసిన సెలబ్రేషన్‌కు మరింత ప్రచారం లభించింది.
కోహ్లీ ఫాలోబ్యాక్‌ కోసం ఎదురుచూపులు
తన అభిమాన క్రికెటర్ల గురించి మాట్లాడిన మేధావి.. విరాట్‌ కోహ్లీ, మిథాలీ రాజ్‌ తన రోల్‌ మోడల్స్‌ అని చెప్పింది. ఢిల్లీకి చెందిన తాను చిన్నప్పటి నుంచే కోహ్లీ ఆటతీరు, ఫిట్‌నెస్‌ను గమనిస్తున్నానని తెలిపింది. ఇప్పుడు కోహ్లీ తనను సోషల్‌ మీడియాలో ఫాలో అవ్వాలని కోరుకుంటున్నానని చెప్పింది. కోహ్లీ నుంచి ఫాలోబ్యాక్‌ వస్తే అది తనకు ఎంతో ప్రత్యేకమైన విషయమని పేర్కొంది.
ఆర్‌సీబీలో ఆడాలన్న కల
మేధావి ఇప్పటికే మహిళల ప్రీమియర్ లీగ్‌ (డబ్ల్యూపీఎల్‌) వేలం పూల్‌లో చోటు సంపాదించింది. భవిష్యత్తులో డబ్ల్యూపీఎల్‌లో ఆడే అవకాశం వస్తే రాయల్‌ ఛాలెంజర్స్‌ బెంగళూరు (ఆర్‌సీబీ) తన మొదటి ఎంపిక అని వెల్లడించింది. కోహ్లీకి ఆర్‌సీబీతో ఉన్న అనుబంధం, ఆ జట్టుకు ఉన్న క్రేజ్‌ తనను ఆకట్టుకుంటాయని తెలిపింది.
ఢిల్లీ క్రికెట్‌ నుంచి ఎదుగుతూ..
20 ఏళ్ల మేధావి బిధూరి ఢిల్లీ దేశవాళీ క్రికెట్‌లో కొంతకాలంగా కొనసాగుతోంది. ఢిల్లీ అండర్‌-19 జట్టుకు కూడా ప్రాతినిధ్యం వహించింది. 2025 డీపీఎల్‌లో సౌత్‌ ఢిల్లీ సూపర్‌స్టార్జ్‌ తరఫున ఆడిన ఆమె.. ఫైనల్లో 3/26తో కీలక ప్రదర్శన చేసి జట్టు టైటిల్‌ గెలవడంలో సహకరించింది. 2026 సీజన్‌లో సెంట్రల్‌ ఢిల్లీ క్వీన్స్‌ తరఫున ఆడుతూ ‘6-7’ సెలబ్రేషన్‌తో ప్రత్యేక గుర్తింపు తెచ్చుకుంది.
Author: Prajaveek Shanam
