న్యూఢిల్లీ, ఆగస్టు 31 (ప్రజా వీక్షణం ప్రతినిధి): సెప్టెంబర్‌ 1 నుంచి సామాన్యుల రోజువారీ జీవితం, ఆర్థిక వ్యవహారాలపై ప్రభావం చూపే పలు కీలక మార్పులు అమల్లోకి రానున్నాయి. అంతర్జాతీయ విమాన ప్రయాణాలు, ఎల్‌పీజీ గ్యాస్‌ కనెక్షన్లు, ఆదాయపు పన్ను రిటర్నులు, ఇంధన ధరలు, వాహనాల కొనుగోలు వంటి అంశాల్లో మార్పులు చోటుచేసుకోనున్నాయి.
విమాన ప్రయాణంలో కొత్త విధానం
అంతర్జాతీయ విమాన ప్రయాణికులకు విమానాశ్రయాల్లో బోర్డింగ్‌ పాస్‌పై ఇమ్మిగ్రేషన్‌ ముద్ర వేసే విధానం నిలిచిపోనుంది. ప్రయాణికులు తమ మొబైల్‌ ఫోన్‌లోని డిజిటల్‌ బోర్డింగ్‌ పాస్‌ లేదా ముద్రించిన బోర్డింగ్‌ పాస్‌ను చూపిస్తే సరిపోతుంది. దీంతో విమానాశ్రయాల్లో ప్రక్రియ మరింత వేగవంతం కానుంది.
గ్యాస్‌ వినియోగదారులకు కీలకం
ఎల్‌పీజీ గ్యాస్‌ కనెక్షన్లకు ఆధార్‌ ఆధారిత ఈ-కేవైసీ పూర్తి చేసేందుకు ఇచ్చిన గడువు ఆగస్టు 31తో ముగుస్తుంది. గడువులోగా కేవైసీ పూర్తి చేయని వినియోగదారుల గ్యాస్‌ సేవలపై ఆంక్షలు విధించే అవకాశం ఉంది. కొన్ని సందర్భాల్లో కనెక్షన్‌ను తాత్కాలికంగా నిలిపివేసే అవకాశం కూడా ఉంటుంది.
పన్ను చెల్లింపుదారులు గమనించాలి
ఆడిట్‌ అవసరం లేని కేటగిరీల పన్ను చెల్లింపుదారులకు ఆదాయపు పన్ను రిటర్నులు దాఖలు చేసేందుకు ఇచ్చిన గడువు ఆగస్టు 31తో ముగుస్తుంది. గడువు దాటిన తర్వాత రిటర్నులు దాఖలు చేస్తే నిబంధనల ప్రకారం అదనపు రుసుములు లేదా ఇతర పరిణామాలు ఎదురయ్యే అవకాశం ఉంది.
ఇంధన ధరల్లో మార్పులు
ప్రతి నెలా మొదటి తేదీన చమురు మార్కెటింగ్‌ సంస్థలు ఇంధన ధరలను సమీక్షిస్తాయి. దీంతో సెప్టెంబర్‌ 1 నుంచి ఎల్‌పీజీ సిలిండర్లు, విమాన ఇంధనం, పెట్రోల్‌, డీజిల్‌ ధరల్లో మార్పులు చోటుచేసుకునే అవకాశం ఉంది.
కార్ల కొనుగోలుదారులకు షాక్‌
కొత్త కారు కొనుగోలు చేయాలనుకునే వారికి ధరల పెంపు ప్రభావం పడనుంది. టాటా మోటార్స్‌ తమ వాహనాల ధరలను గరిష్ఠంగా రూ.25 వేల వరకు పెంచుతున్నట్లు ప్రకటించింది. మరోవైపు హ్యుందాయ్‌ మోటార్స్‌ వాహనాల ధరలను ఒక శాతం మేర పెంచనున్నట్లు వెల్లడించింది. దీంతో కొత్త కారు కొనుగోలు చేసే వారికి అదనపు భారం పడనుంది.
Author: Prajaveek Shanam
