శ్రీకాకుళం, ఆగస్టు 31 ప్రజా వీక్షణం ప్రతినిధి):
ప్రజల నుంచి అందుతున్న ఫిర్యాదులను త్వరితగతిన పరిష్కరించి బాధితులకు సత్వర న్యాయం అందించాలని జిల్లా ఎస్పీ కె.వి. మహేశ్వర రెడ్డి, ఐపీఎస్ పోలీసు అధికారులను ఆదేశించారు. సోమవారం జిల్లా పోలీసు కార్యాలయంలో నిర్వహించిన ప్రజా ఫిర్యాదుల స్వీకరణ కార్యక్రమంలో జిల్లాలోని వివిధ ప్రాంతాల నుంచి వచ్చిన ప్రజల నుంచి మొత్తం 63 ఫిర్యాదులను ఆయన స్వీకరించారు. ఈ సందర్భంగా ఎస్పీ మాట్లాడుతూ ప్రజల నుంచి అందిన ప్రతి అర్జీని అత్యంత ప్రాధాన్యంతో పరిశీలించాలని సూచించారు. సంబంధిత అధికారులు ప్రత్యేక చొరవ తీసుకుని చట్టప్రకారం విచారణ జరిపి సమస్యల పరిష్కారానికి చర్యలు చేపట్టాలని ఆదేశించారు. ఫిర్యాదుల పట్ల ఎట్టి పరిస్థితుల్లోనూ నిర్లక్ష్యం వహించరాదని స్పష్టం చేశారు.
అర్జీలను ఎస్పీ స్వయంగా పరిశీలించి ఫిర్యాదుదారులతో మాట్లాడి వారి సమస్యలను తెలుసుకున్నారు. అనంతరం సంబంధిత అధికారులతో ఫోన్‌లో మాట్లాడి వెంటనే విచారణ ప్రారంభించి త్వరితగతిన పరిష్కార చర్యలు తీసుకోవాలని సూచించారు. ప్రతి కేసును బాధితుల కోణంలో పరిశీలించి న్యాయం జరిగేలా చర్యలు తీసుకోవాలని అధికారులకు తెలిపారు. పబ్లిక్ గ్రీవెన్స్ కార్యక్రమంలో పౌర సంబంధాలు, కుటుంబ వివాదాలు, ఆస్తి తగాదాలు, మోసపూరిత వ్యవహారాలు తదితర అంశాలకు సంబంధించిన ఫిర్యాదులు అధికంగా వచ్చినట్లు అధికారులు తెలిపారు. ప్రజలు తమ సమస్యలను నేరుగా ఎస్పీ దృష్టికి తీసుకురావడంతో వాటి పరిష్కారానికి తక్షణ చర్యలు ప్రారంభించినట్లు వెల్లడించారు.ప్రజల విశ్వాసాన్ని నిలబెట్టే విధంగా పోలీసు శాఖ పనిచేయాలని ఎస్పీ పేర్కొన్నారు. ప్రజల సమస్యలను పరిష్కరించడం పోలీసు శాఖ ప్రధాన బాధ్యత అని, ప్రతి ఫిర్యాదును నిష్పక్షపాతంగా విచారించి చట్టబద్ధమైన చర్యలు తీసుకోవాలని సూచించారు. ప్రజా ఫిర్యాదుల స్వీకరణ కార్యక్రమంలో అందిన 63 అర్జీలపై సంబంధిత అధికారులు చేపట్టిన చర్యలకు సంబంధించిన సమగ్ర నివేదికను జిల్లా పోలీసు కార్యాలయానికి సమర్పించాలని ఎస్పీ ఆదేశించారు. ప్రజలకు త్వరితగతిన న్యాయం అందించేందుకు పోలీసు శాఖ కట్టుబడి ఉందని ఆయన స్పష్టం చేశారు.
Author: Prajaveek Shanam
