న్యూఢిల్లీ, సెప్టెంబర్‌ 03 (ప్రజా వీక్షణం ప్రతినిధి): భారత వన్డే జట్టు ఓపెనర్‌ రోహిత్‌ శర్మ భవిష్యత్తుపై కొంతకాలంగా కొనసాగుతున్న ఉత్కంఠకు సంబంధించి ఆసక్తికర విషయాలు వెలుగులోకి వచ్చాయి. రాబోయే ప్రపంచకప్‌ను దృష్టిలో ఉంచుకుని భారత సెలక్షన్‌ కమిటీ రూపొందించిన భవిష్యత్‌ ప్రణాళికల్లో రోహిత్‌ శర్మకు చోటు లేదని ఇంగ్లండ్‌ పర్యటన సమయంలోనే సెలక్టర్లు ఆయనకు చెప్పినట్లు తాజా నివేదికలు పేర్కొంటున్నాయి. యువ బ్యాటర్‌ యశస్వి జైస్వాల్‌కు అవకాశాలు కల్పించాలనే ఉద్దేశంతో ఈ నిర్ణయం తీసుకున్నట్లు సమాచారం.
పీటీఐ కథనం ప్రకారం.. సెలక్టర్లు తమ నిర్ణయాన్ని రోహిత్‌కు వివరించిన సమయంలో ఆయన తీవ్ర అసంతృప్తి వ్యక్తం చేసినట్లు తెలుస్తోంది. తాను పూర్తి ఫిట్‌నెస్‌తో ఉన్నానని, దేశానికి ప్రాతినిధ్యం వహించేందుకు ఇప్పటికీ ఎంతో ఆసక్తిగా ఉన్నానని రోహిత్‌ స్పష్టం చేసినట్లు సమాచారం. తన ఫిట్‌నెస్‌పై ప్రత్యేక శ్రద్ధ తీసుకుంటున్న విషయాన్ని కూడా సెలక్టర్ల దృష్టికి తీసుకెళ్లినట్లు తెలుస్తోంది. అయితే, కొంత చర్చ జరిగిన అనంతరం సెలక్టర్ల నిర్ణయాన్ని రోహిత్‌ అంగీకరించినట్లు నివేదికలు పేర్కొంటున్నాయి.
ఈ పరిణామాల నేపథ్యంలో జులై 19న లార్డ్స్‌లో ఇంగ్లండ్‌తో జరిగిన మూడో వన్డేనే రోహిత్‌ శర్మ కెరీర్‌లో చివరి మ్యాచ్‌ కావచ్చంటూ వార్తలు ఒక్కసారిగా వైరల్‌ అయ్యాయి. రోహిత్‌ ఇక వన్డేలకు దూరం కానున్నాడనే ప్రచారం సామాజిక మాధ్యమాల్లో తీవ్ర చర్చకు దారితీసింది. అభిమానులు కూడా ఈ వార్తలపై తీవ్రంగా స్పందించారు.దీంతో భారత క్రికెట్‌ నియంత్రణ మండలి కార్యదర్శి దేవజిత్‌ సైకియా స్పందించి రోహిత్‌ రిటైర్మెంట్‌ వార్తలను ఖండించారు. జట్టు భవిష్యత్‌ ప్రణాళికల్లో రోహిత్‌ ఉన్నంతకాలం అతడు భారత జట్టుకు అందుబాటులో ఉంటాడని స్పష్టం చేశారు. దీంతో అప్పట్లో రోహిత్‌ వన్డే కెరీర్‌పై నెలకొన్న అనిశ్చితికి కొంతవరకు తెరపడింది.
బ్యాట్‌తోనే సమాధానం
రిటైర్మెంట్‌పై ఊహాగానాలు, తన భవిష్యత్తుపై జరుగుతున్న చర్చల మధ్య రోహిత్‌ శర్మ మాత్రం మైదానంలో తన ఆటపైనే దృష్టి పెట్టాడు. కీలక మ్యాచ్‌లో అద్భుతమైన శతకం సాధించి విమర్శలకు, పుకార్లకు బ్యాట్‌తోనే సమాధానం ఇచ్చాడు. తనలో ఇంకా పరుగులు చేసే సత్తా ఉందని మరోసారి నిరూపించాడు.
తన భవిష్యత్తుపై జరుగుతున్న చర్చలపై రోహిత్‌ కూడా స్పందించాడు. అనవసరమైన ప్రచారాన్ని తాను పెద్దగా పట్టించుకోనని స్పష్టం చేశాడు. తన బాధ్యత మైదానంలో బ్యాట్‌తో రాణించడం, దేశం కోసం ఆడటం, జట్టు విజయానికి తన వంతు సహకారం అందించడమేనని తెలిపాడు.
“నా పని బ్యాట్‌తోనే. మైదానంలోకి వచ్చి దేశం కోసం, జట్టు కోసం ఆడటం నా బాధ్యత. నేను అరంగేట్రం చేసినప్పటి నుంచి నాకు ఇదే చెప్పారు. నేను ఇప్పటికీ అదే చేస్తున్నాను” అని రోహిత్‌ పేర్కొన్నాడు.
తన కెరీర్‌ ప్రారంభమైనప్పటి నుంచి ఇలాంటి చర్చలు, ఊహాగానాలు కొనసాగుతూనే ఉన్నాయని రోహిత్‌ అన్నాడు. తాను క్రికెట్‌ ఆడుతున్నంతకాలం ఇలాంటి విషయాలు ఉంటాయని, వాటిని పట్టించుకుంటూ కూర్చుంటే ఆటపై దృష్టి పెట్టలేమని స్పష్టం చేశాడు. మైదానంలో తాను ఏం చేస్తున్నానన్నదే ముఖ్యమని, జట్టు విజయానికి ఉపయోగపడటమే తన ప్రధాన లక్ష్యమని రోహిత్‌ తేల్చిచెప్పాడు.
భారత వన్డే జట్టులో యువ ఆటగాళ్లకు ప్రాధాన్యం పెరుగుతున్న వేళ.. రోహిత్‌ అనుభవం, ఫిట్‌నెస్‌, ప్రస్తుత ఫామ్‌ కూడా కీలక అంశాలుగా మారాయి. రాబోయే రోజుల్లో సెలక్టర్లు తీసుకునే నిర్ణయాలపై రోహిత్‌ వన్డే కెరీర్‌ దిశ మరింత స్పష్టమయ్యే అవకాశం ఉంది.
Author: Prajaveek Shanam
