గౌదమాకులపల్లిలో ఘనంగా గురువుదేవర వేడుకలు
ప్రత్యేక పూజల్లో పాల్గొన్న ఎమ్మెల్యే అమర్‌నాథ్‌రెడ్డి.. తరలివచ్చిన భక్తులు
పెద్దపంజాణి, సెప్టెంబర్ 20: పెద్దపంజాణి మండలం నాగిరెడ్డిపల్లి పంచాయతీ పరిధిలోని గౌదమాకులపల్లిలో గురువుదేవర వేడుకలు ఆదివారం భక్తిశ్రద్ధలతో ఘనంగా నిర్వహించారు. ఐదేళ్లకోసారి జరిగే ఈ ప్రత్యేక ఆధ్యాత్మిక వేడుకలను పురస్కరించుకుని గ్రామంలో పండుగ వాతావరణం నెలకొంది. నాగిరెడ్డిపల్లి పంచాయతీతో పాటు చుట్టుపక్కల గ్రామాల నుంచి పెద్ద సంఖ్యలో భక్తులు తరలివచ్చి ప్రత్యేక పూజల్లో పాల్గొన్నారు.
ఈ వేడుకలకు పలమనేరు ఎమ్మెల్యే అమర్‌నాథ్‌రెడ్డి ముఖ్యఅతిథిగా హాజరయ్యారు. గ్రామస్తులతో కలిసి గురువుదేవర స్వామివారికి ప్రత్యేక పూజలు నిర్వహించారు. భక్తిశ్రద్ధలతో సాగిన పూజా కార్యక్రమాల్లో పాల్గొని స్వామివారి ఆశీస్సులు పొందారు.
వేడుకల సందర్భంగా గ్రామంలో ఆధ్యాత్మిక సందడి నెలకొంది. భక్తులు స్వామివారిని దర్శించుకుని మొక్కులు చెల్లించుకున్నారు. పూజా కార్యక్రమాల అనంతరం గ్రామస్తులు ఎమ్మెల్యే అమర్‌నాథ్‌రెడ్డిని ఘనంగా సన్మానించి తీర్థప్రసాదాలు అందజేశారు.
ఈ సందర్భంగా ఎమ్మెల్యే మాట్లాడుతూ గురువుదేవర స్వామివారి కృప, ఆశీస్సులు ప్రజలందరిపై ఎల్లప్పుడూ ఉండాలని ఆకాంక్షించారు. ప్రతి కుటుంబం సుఖసంతోషాలతో, ఆయురారోగ్యాలతో ఉండాలని కోరుకున్నారు. గ్రామంలో ఇలాంటి ఆధ్యాత్మిక కార్యక్రమాలు ఐక్యతకు దోహదపడతాయని పేర్కొన్నారు.
కార్యక్రమంలో టీడీపీ మండల నాయకులు మురహరరెడ్డి, చలపతి, రుద్రమూర్తి నాయుడు, చంద్ర, వేణు, బాలు, పంచాయతీ నాయకులు సుబ్రహ్మణ్యంరెడ్డి, లక్ష్మీనారాయణరెడ్డి, జయరామ్‌రెడ్డి, శంకర్‌రెడ్డి, భూపతి, రఘుపతిరెడ్డి, నరసింహారెడ్డి, బాబురెడ్డి, ఎంపీటీసీ రామచంద్ర తదితరులు పాల్గొన్నారు.
ఫోటో రైట్‌అప్: గౌదమాకులపల్లి గ్రామ సమీపంలో గురువుదేవర స్వామివారికి ప్రత్యేక పూజలు నిర్వహిస్తున్న ఎమ్మెల్యే అమర్‌నాథ్‌రెడ్డి.
Author: Prajaveek Shanam
