ప్రజల సమస్యల పరిష్కారానికి కలెక్టరేట్లో ప్రత్యేక వేదిక ఏర్పాటుచేయనున్నట్లు జిల్లా కలెక్టర్ ఎస్. వెంకటేశ్వర్ తెలిపారు. సోమవారం ఉదయం 10 గంటల నుంచి మధ్యాహ్నం 2 గంటల వరకు ఈ కార్యక్రమం నిర్వహించబడుతుందని వెల్లడించారు. జిల్లాలోని అన్ని శాఖల అధికారులు ఒకే వేదికపై పాల్గొని ప్రజల సమస్యలను నేరుగా స్వీకరించి పరిష్కరించేందుకు చర్యలు తీసుకుంటారని చెప్పారు. పరిష్కారం కాని అర్జీలకు సంబంధించి 1100 నంబర్ ద్వారా సమాచారం పొందవచ్చని సూచించారు. కొత్త అర్జీలు నమోదు చేసుకోవడానికి వెబ్సైట్ సౌకర్యం కూడా అందుబాటులో ఉందన్నారు. సమస్య పరిష్కారమైన వెంటనే అర్జీదారుల ఫోన్కు సందేశం పంపబడుతుందని తెలిపారు. నోటీసులు, ఎండార్స్మెంట్లు వాట్సాప్ ద్వారా పంపడమే కాకుండా రిజిస్టర్ పోస్టు ద్వారా కూడా అందజేస్తామని పేర్కొన్నారు. అర్జీలు పూరించే సమయంలో ఎలాంటి పొరపాట్లు లేకుండా సరిగా నమోదు చేయాలని సూచించారు. గతంలో ఇచ్చిన అర్జీలకు సంబంధించిన స్లిప్పులు తప్పనిసరిగా తీసుకురావాలని ప్రజలకు సూచించారు. ప్రజల సమస్యలే తమ ప్రాధాన్యమని, ఈ వేదిక ద్వారా ప్రతి సమస్యకు వేగంగా మరియు పారదర్శకంగా పరిష్కారం అందించడమే లక్ష్యమని జిల్లా కలెక్టర్ స్పష్టం చేశారు. ప్రజలు ఈ అవకాశాన్ని వినియోగించుకుని తమ సమస్యలను తెలియజేసి పరిష్కారం పొందాలని ఆయన విజ్ఞప్తి చేశారు.
